CNN Türk-ի փոխանցմամբ, Թուրքիայի արտգործնախարար Ահմեդ Դավութօղլուն գիշերը հեռախոսազրույց է ունեցել Եգիպտոսի արտգործնախարար Նաբիլ Ալ-Արաբիի և ԱՄՆ պետքարտուղար Հիլարի Քլինթոնի հետ:
Եգիպտոսի արտգործնախարարի հետ Դավութօղլուն քննարկել է Պաղեստինի ներքին խնդիրները: Իսկ Քլինթոնի հետ հեռախոսազրույցի ժամանակ կողմերը գնահատական են տվել պաղեստինյան «ՀԱՄԱՍ» և «Ֆաթհ» խմբավորումների միջև ձեռք բերված կոնսենսուսին:
Քննարկման առարկա են հանդիսացել նաև Լիբիայի և Սիրիայի վերջին զարգացումները, այդ թվում՝ նաև Լիբիայի վերաբերյալ Թուրքիայի առաջարկած «ճանապարհային քարտեզը»:
Հիշեցնենք, որ Լիբիայի վերաբերյալ թուրքական «ճանապարհային քարտեզը» բաղկացած է 3 կետից: Այդ պլանով նախատեսվում է գործընթացի խաղաղ կարգավորում, որը հիմնված պետք է լինի Լիբիայի տարածքային ամբողջականության ու ինքնիշխանության սկզբունքների հիման վրա:
Բացի այդ, պետք է վերջ տրվի լիբիական ժողովրդի դեմ իրականացվող հարձակումներին, և զինադադարի ռեալ ամրագրման ու մարդասիրական օգնության առաքման համար Լիբիայում պետք է ստեղծվեն մի շարք անվտանգ գոտիներ:
Եվ, վերջապես, Լիբիայում պետք է իրականացվեն լայնամասշտաբ ժողովրդավարական բարեփոխումներ, որոնք լիբիական ժողովրդին հնարավորություն կընձեռեն այսուհետ ընտրելու իր ղեկավարներին և ճանապարհ կհարթեն սահմանադրական կարգի հաստատման համար:
