«Ազգային պատկերասրահ» միջազգային երաժշտական յոթերորդ փառատոնը մեկնարկել է և տևելու է մինչև մայիսի 31-ը:
Փառատոնի նպատակն է արվեստասեր հասարակությանը ներկայացնել հայ և համաշխարհային դասական երաժշտարվեստի նմուշները`հանրահայտ, ինչպես նաև Հայաստանում ճանաչում չունեցող հայ և օտարազգի տաղանդաշատ երաժիշտ-կատարողների և ստեղծագործական կոլեկտիվների կատարմամբ: Փառատոնը նաև խնդիր ունի հասարակության լայն շերտերին ծանոթացնել Հայաստանի ազգային պատկերասրահի գլուխգործոցներին:
Փառատոնի շրջանակներում կատարումներով հանդես են գալու Ալեքսանդր Բրուսիլովսկին` ջութակ (Ֆրանսիա), Սվետլանա Նավասարդյանը` դաշնամուր, Նիկոլայ Մադոյանը` ջութակ (Գերմանիա), Հակոբ Ջաղացպանյանը` կիթառ, Գլեբ Կարպուշկինը` գալարափող (Ռուսաստան), Հայկ Մելիքյանը` դաշնամուր, Կարեն Շահգալդյանը` ջութակ, Յանա Դարյանը` ալտ, Ջուլիետա Վարդանյանը` դաշնամուր, «Հայաստանի պատանի տաղանդներ»` «Լոնդոն-Երևան» ծրագրի մասնակիցները, կոմպոզիտոր, դիրիժոր Հուշյար Խայամը (Իրան), կամերային նվագախումբը:
Փառատոնի հանդիսավոր բացման համերգը նվիրված է կոմպոզիտոր, ԽՍՀՄ Ժողովրդական արտիստ Էդվարդ Միրզոյանի 90-ամյա հոբելյանին: Հայաստանի առաջատար երաժիշտների կատարմամբ, առաջին անգամ մեկ համերգի ընթացքում կհնչեն Էդվարդ Միրզոյանի կամերային հատընտիր ստեղծագործությունները:
Նշենք, որ փառատոնը կազմակերպել է «Արվեստների պատկերասրահ» մշակութային հիմնադրամը` ՎիվաՍել-ՄՏՍ-ի հովանավորությամբ և ՀՀ մշակույթի նախարարության աջակցությամբ: