Ֆրանսիայի վարչապետ Ժան-Մարկ Էրոն իր կաբինետի նախարարներին կարգադրել է դադարեցնել կիրառել անգլերենը այն բանից հետո, երբ նրա երկու գործընկերներն իրենց նոր առաջարկն անվանել են silver economy («արծաթե տնտեսություն»)։ Այս մասին հաղորդում է The Daily Mail-ը:
Նախարարներին ուղղված նամակում Ֆրանսիայի վարչապետը գրել է. «Հանրապետության լեզուն ֆրանսերենն է»:
Ժան-Մարկ Էրոն նման հրաման է տվել այն բանից հետո, երբ Ֆրանսիայի մշակույթի նախարարը հրապարակել է անգլերեն բառերի ցուցակ, որոնք պետք է արգելվեն ֆրանսերենում։ Դրանց թվում են email, blog, supermodel, take-away և մի շարք այլ բառեր:
Վարչապետի խոսքերով՝ ֆրանսերենը կարող է արտահայտել ցանկացած ժամանակակից իրականություն և նկարագրել նորարարություններ, որոնք մշտապես ծնվում են գիտության և տեխնոլոգիայի ոլորտներում:
Ֆրանսերենը, որպես վարչակազմի և դատարանների լեզու, երկրի սահմանադրության մեջ ներառվել է 1992 թ.:
«Արծաթե տնտեսություն» ծրագիրը, որն առաջարկվել է Ֆրանսիայի արդյունաբերության նախարար Առնո Մոնտեբուրի և թոշակառուների հարցերով նախարար Միշել Դելոնի կողմից, նախատեսում է խմբավորել ավագ սերունդներին պատկանող բիզնեսը: Նրանցից մեկի խորհրդականը փորձել է արադարացնել ներկայում արգելված տերմինը՝ ասելով, որ անգլերեն տերմինն ավելի հարմար է մի սեկտորի համար, որը նախատեսում է ընդլայնել արտահանումը:
