Թուրքիայի հետ սահմանից 4.5 կմ հեռավորության վրա գտնվող սիրիացի փախստականների ճամբարի վրա օդային կրակ է արձակվել, ինչի հետևանքով զոհվել է 2, վիրավորվել 54 մարդ: Այս մասին հաղորդում է Anadolu գործակալությունը՝ վկայակոչելով Թուրքիայի Հաթայ մարզի նահանգապետ Ջելալեդին Լեքեսիզին:
Նրա խոսքերով՝ վիրավորները տեղափոխվել են Թուրքիայի Ռեյհանլի և Անթաքյա քաղաքների պետական հիվանդանոցներ: Վիրավորներից 19-ի վիճակը ծանր է: Նահանգապետը նաև հաղորդել է, որ Սիրիայի ընդդիմության կողմից վերահսկվող տարածքում՝ Բաբ Ալ-Հավա հսկիչ անցակետի մոտ տեղակայված ճամբարը հարձակման է ենթարկվել Սիրիայի կառավարական զորքերի կողմից:
Թուրքական ԶԼՄ-ների փոխանցմամբ՝ դեպքից հետո ճամբարում մնացած սիրիացիները անցել են Թուրքիայի տարածք:
Ներկայում Թուրքիայում գտնվում է շուրջ 350 հազար սիրիացի փախստական, նրանցից 191 հազարը բնակվում են հատուկ ստեղծված ճամբարներում:
