Բրիտանացի կալանավորները կզրկվեն մեծ քանակությամբ բռնության կադրերով, ինչպես նաև մեծահասակների համար նախատեսված ֆիլմերից: Այս մասին է այսօր ասվում Բրիտանիայի արդարադատության նախարարության կողմից հրապարակված Միացյալ Թագավորության բանտային ռեժիմի խստացման ծրագրում:
«Ճիշտ չէ, երբ կալանավորները ցերեկներն իրենց բանտախցերում նստած հեռուստացույց են դիտում այն ժամանակ, երբ ամբողջ պետությունը աշխատում է: Երկար ժամանակ կարծիք կար, որ կալանավորներին արտոնություններ են տրվում միայն այն բանի համար, որ նրանք ռեժիմը չեն խախտում: Այսպես այլևս չի կարող շարունակվել»,-հայտարարել է Բրիտանիայի արդարադատության նախարար Քրիս Գրեյլինգը՝ մեկնաբանելով նորամուծությունը:
Արդարադատության նախարարության ծրագրի համաձայն՝ այսուհետ արտոնությունների հույս կարող են ունենալ միայն այն կալանավորները, ովքեր մասնակցում են հասարակական աշխատանքների կամ կրթական ծրագրերի: Արտոնությունների թվում են՝ բանտային հագուստի փոխարեն իրենց սեփական հագուստը կրելը:
Իսկ որոշ արտոնություններ ընդհանրապես կհանվեն: Օրինակ, մասնավոր ընկերությունների վերահսկողության տակ գտնվող բանտերում կանջատվեն վճարովի հեռուստաալիքները: «Մասնավոր» բանտերի կալանավորները այլևս հնարավորություն չեն ունենա դիտել անգլիական ֆուտբոլային խաղերը, 18+ դասի ֆիլմերը, որոնց թվին Բրիտանիայում պատկանում են մարտաֆիլմերը, սարսափ-ֆիլմերը և պոռնոգրաֆիան:
