ԱՄՆ նախագահի թեկնածու Դոնալդ Թրամփը օրերս կոչ էր արել արգելել ԱՄՆ քաղաքացի չհանդիսացող մուսուլմանների մուտքը Միացյալ Նահանգներ։ Սակայն նման դիրքորոշումը, ինչպես երևում է, չի խանգարում գումար աշխատելու նրա ձգտմանն այն պետություններում, որտեղ բնակչության մեծ մասն իսլամ է դավանում։ Ադրբեջանը նման պետություններից մեկն է։
Վերջին տարիներին Ադրբեջանի իշխանությունները ցուցաբերում են աճող ավտորիտար հակումներ։ Նրանց կողմից ծավալվել է մարդու իրավունքների սահմանափակման և անկախ ԶԼՄ-ների աշխատանքին խոչընդոտելու լայնածավալ արշավ։
Դեկտեմբերի 17-ին Նյու Յորք նահանգից ամերիկյան հանրապետական կոնգրեսական Ջերսի Քրիստոֆեր Սմիթը Կոնգրեսի դիտարկմանն է ներկայացրել ադրբեջանական էլիտայի անդամների նկատմամբ պատժամիջոցներ սահմանելու մասին օրինագիծ։ Դրա ընդունման դեպքում, մասնավորապես, այցագրերի հարցում կմերժվեն այն անձինք, ովքեր զգալի ֆինանսական օգուտներ են ստանում բարձրագույն ղեկավարության հետ գործարքներից։ Խոսքը վերաբերում է նաև Ադրբեջանի իրավապահ ու դատական մարմինների ներկայացուցիչներին։
«Միացյալ Նահանգներն այլևս չի կարող աչք փակել Ադրբեջանում մարդու իրավունքների սարսափելի խախտումների վրա»,- ասվում է Սմիթի հայտարարության մեջ։
Բաքվի կենտրոնում գտնվող Trump International Hotel & Tower համալիրը կառուցվել է և գտնվում է «Գարանտ» հոլդինգի սեփականության ներքո, որը վերահսկվում է Ադրբեջանի տրանսպորտի նախարար Զիա Մամեդովի որդու՝ Անար Մամեդովի կողմից։
Առագաստի ձև ունեցող այդ 33 հարկանի շենքում տեղակայված են 900-9000 քառակուսի ֆուտ մակերեսով «ուլտրա-լյուքս» դասի 72 նստավայրեր և 189 հյուրանոցային համարներ՝ սկսած 645 քառակուսի ֆուտից։
Անար Մամեդովը տնօրինում է մի շարք ընկերությունների ենթակառուցվածքային, շինարարական, նավթի ու գազի արդյունահանման, միջազգային առևտրի և հեռահաղորդակցությունների ոլորտում։ Նա նաև Ադրբեջանա-ամերիկյան դաշինքի հիմնադիրն է և Ադրբեջանի գոլֆի ֆեդերացիայի նախագահը։
«Գարանտ» հոլդինգի ներկայացուցիչները չեն պատասխանել EurasiaNet.org-ի բազմաթիվ խնդրանքներին՝ մեկնաբանելու ընկերության կապերը Թրամփի հետ և հնարավոր հետևանքները Թրամփի արած հայտարարությունների արդյունքում։
Չնայած Ադրբեջանի քաղաքական և տնտեսական էլիտայի ներկայացուցիչների մեծ մասը նախընտրում է չմեկնաբանել Թրամփի խոսքերը, համենայնդեպս նրանցից մեկը՝ պատգամավոր Ֆազիլ Մուստաֆան, կարծում է, որ Ադրբեջանի պաշտոնատար անձինք պետք է արտահայտվեն այդ թեմայով։
«Պետք է կոշտ պատասխան տալ այդ հայտարարությանը։ Դա ռասիզմ է,- ասել է նա մուսուլանների վերաբերյալ Թրամփի խոսքերի մասին:- Հույս ունեմ, որ մեր կողմից պատասխան կհաջորդի»։
