Երևանի ավագանու ընտրություններին մասնակցելու հայտ ներկայացրած բոլոր կուսակցությունները հանդես եկան իրենց կարգախոսներով:
Հոգեբանների հավաստմամբ՝ կարգախոսն այնքան էլ մեծ ազդեցություն չունի մարդու ենթագիտակցության վրա, այսինքն՝ տվյալ կուսակցությանն ընտրելու համար մարդիկ այնքան էլ ուշադրություն չեն դարձնում, թե ինչ կարգախոսով է հանդես գալիս տվյալ կուսակցությունը:
Հոգեբան Անուշ Բաղդասարյանը «Առաջին լրատվական»-ի հետ զրույցում կարծիք հայտնեց, որ ընտրված կուսակցություններից և ոչ մեկն էլ չի ընտրել այնպիսի կարգախոս, որը կարող է գրավել ընտրազանգվածին:
«Ստաբիլ կարգախոսներ են, որոնց մարդիկ այնքան էլ չեն հավատում: Ընդհանրապես հայ հասարակությունն արդեն սովոր է ընտրություններից առաջ լսել խոստումներ, բոցաշունչ ելույթներ, բայց ընտրություններից անմիջապես հետո հիասթափություն ապրել:
Ինչ վերաբերում է կարգախոսներին, ապա մինչ օրս իրենց քարոզարշավների ընթացքում շատ են կրկնում կարգախոսները ԲՀԿ-ն, ՀՀԿ-ն և ՀԱԿ-ը: Ես անձամբ կարծում էի,թե «Ժառանգության» կարգախոսը «Բարև Երևանն» է և միայն Ձեզնից իմացա, որ այլ բան է:Սակայն կարծում եմ, որ, օրինակ, իրենք այդքան էլ շեշտը չեն դրել կարգախոսի վրա, ճիշտ այնպես՝ ինչպես Դաշնակցությունը, «Օրինաց երկիրը»»,- կարծիք հայտնեց հոգեբանը:
Զրուցեցինք նաև «Այգ» Հոգեբանական կենտրոնի տնօրեն, հոգեբանական գիտությունների դոցենտ Ռուբեն Պողոսյանի հետ: Վերջինս, անդրադառնալով կուսակցությունների կարգախոսներին, ասաց, որ դրանցից յուրաքանչյուրն էլ գուցե ինչ-որ չափով բնորոշում են իրենց, սակայն մարդկանց ընտրության վրա այդքան էլ մեծ ազդեցություն չեն թողնում:
«Օրինակ՝ գիտեմ, որ ՀԱԿ-ն ամսի 30-ին հանրահավաք է հրավիրել, այդ կարգախոսը բնորոշում է իրենց, բնականաբար հանրահավաքին էլ կհնչեն ելույթներ այդ տրամաբանության մեջ:Կարծում եմ՝ նրանք պատրաստ են գնալ այդ կարգախոսի հետևից, այլ հարց, որ հասարակությանն այլևս դա չի հուզում:
«Արթնացիր» կարգախոսի առնչությամբ հետևյալ կարծիքին եմ. Ժողովուրդն արթնացել էր նախագահական ընտրություններից առաջ, կարծում եմ՝ ուշացած կարգախոս է ընտրվել:
«Ավելի լավ Երևան»՝ ոչինչ չասող կարգախոս է. գիտեքինչ, «Ավելի լավ Երևան» կարգախոսն ավելի շուտ շեշտումէ, թե ինչ հսկայական խոռոչներ ունի Երևանը՝ մանավանդ այն դեպքում, երբ կարգախոսն ընտրել է իշխանության թեկնածուն:
«Սկսենք Երևանից» կարգախոսը նույնական է Տարոն Մարգարյանի կարգախոսին: Այսինքն՝էլի մեկնարկում ենք վատ վիճակից՝ այս դեպքում ասելով, որ մեկնարկում ենք 0-ից. ի՞նչ տարբերություն, վատն ու զրոն նույնն են:
«Մենք կարող ենք ավելին» տիպիկ իշխանական կարգախոս է, որը նմանեցնում եմ նորից ՀՀԿ-ի կարգախոսին:
Դաշնակցության «Փոխենք Երևանը»շատ թույլ կարգախոս է, անհասկանալի է՝փոխել արտաքի՞ն, թե՞ներքին կառուցվածքը, անհասկանալի է, թե ինչ է ուզում ասել կարգախոսը»,- նկատեց Ռուբեն Պողոսյանը:
Հոգեբանի հավաստմամբ՝ նախագահական ընտրություններից հետո ժողովրդի բողոքավոր հատվածն այդպես էլ չտեսավ կազմակերպված ընդդիմադիր ալիք, և կարգախոսներով չէ, որ նա գնալու է ընտրությունների:
