Վրաստանի վարչապետ Բիձինա Իվանիշվիլին ընդդիմադիր «Միացյալ ազգային շարժում» կուսակցության ներկայացուցիչներին ու կողմնակիցներին «հիմարներ» է անվանել ու նրանց լռելու կոչ արել: Այս մասին նա հայտարարել է ֆրանսիական Le Monde պարբերականի հետ հարցազրույցում:
Լրագրողի այն հարցին, թե ինչպես է Իվանիշվիլին գնահատում իր ելույթը ԵԽԽՎ-ում, վարչապետը պատասխանել է. «Զգում էի ինձ, ինչպես ձուկը ջրում: Սաակաշվիլին կորցրել է արժեքն Արևմուտքում: Բոլորն իմացան, թե ինչպիսի դեմոկրատներ էին նրանք… Մեր թիմը մաքուր է, ազնիվ, պահարանում կմախքներ չի պահում: ԱՄՆ-ում հեռանկարը փոխվել է, և վերջին ամսում նույնն է տեղի ունենում նաև Եվրոպայում: Վրաստանում մեր ժողովրդականությունն անշեղորեն աճում է: Նրանք գոռում են ու գոռում: Նրանք կարողանում են միայն սուտ տարածել: Դրանք հիմարներ են, որոնք չեն հասկանում, որ իրենց ժամանակաշրջանը մոռացության է մատնվել, պետք է լռեն կամ ներողություն խնդրեն»:
Իվանիշվիլիի խոսքերով՝ ինքը ԵԽԽՎ-ում շատ հագիստ է պատասխանել բոլոր հարցերին: Վարչապետը կարծում է, որ եթե պահարանում կմախքներ չունես, ապա նյարդայնանալու պատճառ չկա:
