Իտալիայի Դեմոկրատական կուսակցության առաջնորդներից Էնրիկո Լետան ձևավորել է նոր կառավարությունը, որի կազմը շաբաթ օրը ներկայացրել է երկրի նախագահ Ջորջո Նապոլիտանոյին: Այս մասին հաղորդում է Ria Novosti-ն՝ վկայակոչելով նախագահի աշխատակազմի գլխավոր քարտուղար Դոնատո Մարային:
Լետայի ձևավորած կառավարության կազմում ընդգրկվել են 21 նախարար: Այսպես, փոխվարչապետի և ներքին գործերի նախարարի պաշտոնը վստահվել է «Ազատության ժողովուրդ» կուսակցության քարտուղար Անջելինո Ալֆանոյին, էկոնոմիկայի նախարար է դարձել Իտալիայի Կենտրոնական բանկի գլխավոր տնօրեն Ֆաբրիցիո Սակոմանին, պաշտպանության նախարար՝ Մարիո Մաուրոն:
Իտալիայի կառավարության կազմում ընդգրկվել են ռեկորդային թվով կանայք: Այժմ Իտալիայի արտգործնախարարը նախկին եվրահանձնակատար Էմմա Բոնինոն է, արդարադատության նախարարը՝ ներքին գործերի նախկին նախարար Աննա Մարիա Կանչիելերին:
Իգական սեռի ներկայացուցիչներն են գրավել նաև գյուղատնտեսության, կրթության և առողջապահության նախարարների պաշտոնները: Իսկ սպորտի և երիտասարդության քաղաքականության նախարար է դարձել աշխարհի բազմակի օլիմպիական չեմպիոն Յոզեֆ Իդեմը:
Ինտեգրման հարցերով նախարարության ղեկավարի պաշտոնը գրավել է Իտալիայում առաջին սևամորթ կին նախարար Սեսիլ Կյենգեն: