Ադրբեջանական Salam News գործակալությանը տված հարցազրույցի ժամանակ ռուս քաղաքագետ, Ռուսաստանի իսլամական կոմիտեի նախագահ Հեյդար Ջեմալը հայտարարել է, որ Վրաստանը պետական հեղաշրջում է պատրաստում Ադրբեջանում.
«Կան տեղեկություններ, որ Վրաստանը պետական հեղաշրջում է պատրաստում Ադրբեջանում: Այժմ Վրաստանի տարածքում այդ ուղղությամբ նախապատրաստական աշխատանքներ են ընթանում: Այդ ամենի պատասխանատվությունը դրված է Վրաստանի Անվտանգության խորհրդի անդամ Գիգա Բոկերիայի վրա: Վրաստանի ադրբեջանցիներից ձևավորվում է երիտասարդների ջոկատ, որոնք պատրաստվում են կոշտ քայլերի գնալ Ադրբեջանում տեղի ունենալիք զանգվածային ելույթների ժամանակ:
Իմ տեղեկություններով, իշխանափոխությանը նվիրված ադրբեջանական ընդդիմության հանրահավաքը կայանալու է մայիսի 28-ին: Արդեն հաջորդ օրը` մայիսի 29-ին, Լոնդոնում նախատեսված է Ադրբեջանին նվիրված կոնֆերանս, որում ԱՄՆ պետքարտուղար Հիլարի Քլինթոնը գնահատական է տալու ադրբեջանական ընդդիմությանն ու կառավարությանը, և այլն:
Այս տարվա մարտին Բոկերիան և մի շարք այլ պաշտոնյաներ այցելեցին Ադրբեջան` վերջինիս իշխանություններին առաջարկելով կնքել հակառուսական քաղաքական դաշինք: Սակայն Ադրբեջանի նախագահը չմտավ այդ խաղի մեջ և հրաժարվեց ադրբեջանա-ամերիկյան համատեղ զորավարժություններից («Տարածաշրջանային պատասխան – 2011»)։
Դրա համար էլ այժմ Վրաստանի ղեկավարությունն ակտիվ ռազմական շփումներ է ունենում Հայաստանի հետ` ընդդեմ Ադրբեջանի (նկատի է առնվում Վրաստանի պաշտպանության նախարարի այցը Հայաստան):
Այս ամենի նախաձեռնողը Վրաստանի արևմտյան գործընկերներն են, ովքեր ցանկանում են Հարավային Կովկասում կրկնել Հյուսիսային Աֆրիկայում և Մերձավոր Արևելքում տեղի ունեցած իրադարձությունները: Այսինքն՝ տվյալ նախագծում Վրաստանը հանդես է գալիս օտարների կամքն արտահայտողի դերում: Ադրբեջանական ընդդիմությունը տեղյակ է այդ մասին:
Ադրբեջանն էլ հանդիսանում է Հարավային Կովկասի և ընդհանուր առմամբ Մեծ Կովկասի առանցքային երկիրը: Եվ եթե այնտեղ իշխանության գան Արևմուտքից առավել մեծ կախում ունեցող քաղաքական գործիչները, ապա նրանք ակնթարթորեն Ադրբեջանը կվերածեն Իրանին հարվածել պատրաստվող ԱՄՆ ռազմաբազայի»:
Հիշեցնենք, որ Հեյդար Ջեմալը հայտնի է իր սենսացիոն հայտարարություններով և իրադարձությունները յուրովի մեկնաբանելով: Մասնավորապես, երբ 2010 թվականի փետրվարի 4-ին Թուրքիայի արտգործնախարար Ահմեդ Դավութօղլուն առաջարկեց ԵՄ-ի օրինակով ստեղծել Եվրասիական միություն` ընդգծելով, որ Եվրասիայի բոլոր երկրները ռազմավարական նշանակություն ունեն Թուրքիայի համար, Հեյդար Ջեմալը դա որակեց որպես Թուրքիայի կողմից ԱՄՆ-ի դեմ պատերազմելու Ռուսաստանին ուղղված հրավեր:
