Ժնևում դեկտեմբերի 8-10-ը կայացել էԿարմիր խաչի և Կարմիր մահիկի 32-րդ միջազգային համաժողովը, որին մասնակցել են Ժնևյան կոնվենցիաների անդամ շուրջ 190 երկրների պաշտոնական պատվիրակություններ, Կարմիր խաչի ազգային ընկերությունների ներկայացուցիչներ:
Ինչպես տեղեկացրին ՀՀ արտաքին գործերի նախարարության մամուլի, տեղեկատվության եւ հասարակայնության հետ կապի վարչությունից, ՀՀ պապատվիրակության ներկայացուցիչ, Ժնևում ՀՀ դեսպանորդ Հասմիկ Տոլմաջյանը համաժողովում ունեցած իր ելույթում շեշտել է, որ միջազգային հանրության կողմից առաջին անգամ դեկտեմբերի 9-ը նշվում է որպես Ցեղասպանության զոհերի հիշատակի և արժանապատվության և այդ հանցագործության կանխարգելման միջազգային օր` այդ կապակցությամբ ընդգծելով այն կարևոր հումանիտար առաքելությունը, որ տարբեր երկրներում գործող Կարմիր խաչի ազգային ընկերությունները, կամավորներն իրականացնել են մարդկության դեմ գործված ոճիրների, այդ թվում` և Հայոց ցեղասպանության դժնի օրերին:
Ելույթում անդրադարձ է կատարվել նաև մեր տարածաշրջանում միջազգային հումանիտար իրավունքի պարբերական ոտնահարումներին, որոնց շարունակական թիրախն է դառնում, մասնավորապես, սահմանամերձ բնակավայրերի քաղաքացիական բնակչությունը:
Համաժողովը Կարմիր խաչի միջազգային շարժման բարձրագույն ներկայացուցչական մարմինն է և գումարվում է քառամյա պարբերականությամբ:
