Մուսուլմանների մուտքն ԱՄՆ արգելելու իր առաջարկով ԱՄՆ նախագահի հանրապետական թեկնածու Դոնալդ Թրամփն օգնում է ԴԱԻՇ-ին ամերիկացի ժողովրդին վատաբանելու փորձերում: Այս մասին գրում է The Washington Post թերթը:
Նշվում է, որ փարիզյան ահաբեկչություններից և Սան Բեռնարդինոյում հրաձգությունից հետո մի շարք արևմտյան քաղաքական գործիչներ մեծ կասկածանքով են արտահայտվում մուսուլմանական երկրներից գնացողների հասցեին, ինչը միայն ուժեղացնում է բևեռացումը հասարակության մեջ: Ըստ պարբերականի՝ ահաբեկիչներին ձեռնտու է, որ ամերիկացիներն ատեն փախստականներին: Այդպիսով ԴԱԻՇ-ին կհաջողվի ավելի շատ կողմնակիցներ ներգրավել՝ հայտարարելով, որ Արևմուտքը նախապաշարմունքով է վերաբերվում մուսուլմաններին:
«Եթե մուսուլման փախստականներին ողջունեն Եվրոպայում, դա կխարխլի ԴԱԻՇ-ի լեգիտիմությունը: Գրեթե լրիվ համոզվածությամբ կարելի է ասել, որ ԴԱԻՇ-ը ցանկանում է, որ դուք փախստականներին հավասարեցնեք ահաբեկիչներին»,- նշում է The Washington Post-ի լրագրող Ադամ Թեյլորը:
Ըստ հոդվածագրի՝ Թրամփի արտահայտությունները բոլորովին չեն նպաստում ազգի միասնությանը, և քաղաքական գործիչը չի գիտակցում, որ իր «անփոփոխ քսենոֆոբիան» կարող է վտանգավոր հետևանքների հանգեցնել: