Բոսթոնի ահաբեկչությունից հետո Ցարնաև եղբայրները նախատեսում էին պայթյուն իրականացնել նաև Նյու Յորքի կենտրոնում գտնվող Թայմս Սքվեր հրապարակում: Ահաբեկիչները պատրաստվում էին քաղաք տեղափոխվել տնային պայմաններում ստեղծված 6 պայթուցիկ նյութերով: Այս մասին հաղորդում է ITAR-TASS-ը:
Ցարնաևները պատրաստվում էին Բոսթոնից Նյու Յորք տեղափոխվել ապրիլի 19-ի գիշերը՝ գողացված ավտոմեքենայով: Նրանց ծրագրերը խախտել է պատանդ վերցված վարորդը: Նրա խոսքերով՝ Թամերլանն ասել է իրեն. «Մենք հենց նոր ոստիկանի սպանեցինք: Մարաթոնի ընթացքում մենք պայթյուն ենք կազմակերպել, իսկ այժմ մեկնում ենք Նյու Յորք»: Ահաբեկիչները նաև ասել են վարորդին, որ նրանք ցանկանում են իր բանկային քարտից գումար հանել: Վարորդին հաջողվել է գազալցակայանում փախչել նրանցից և զգուշացնել ոստիկաններին: Դրանից հետո սկսվել է նրանց հետապնդումը. փոխհրաձգության ընթացքում սպանվել է 26-ամյա Թամերլանը, իսկ Ջոհարը ծանր վիրավոր է և այժմ հիվանդանոցում է գտնվում:
«Երեկ երեկոյան ՀԴԲ-ն մեզ զգուշացրել է այն մասին, որ ահաբեկչության կենդանի մնացած կազմակերպիչը խոսոտվանել է, որ նրանց հաջորդ հարձակման թիրախը Նյու Յորքն է եղել: Նրանք ունեցել են տնային պայմաններում պատրաստված 6 ռումբեր»,- մամլո ասուլիսում հաղորդել է Նյու Յորքի քաղաքապետ Մայքլ Բլումբերգը:
Իսկ Նյու Յորքի ոստիկանության պետ Ռել Քելիի խոսքերով՝ Ջոհարն ասել է, որ ինքը և եղբայրը հանկարծ են ընդունել Նյու Յորք մեկնելու որոշումը: