Բոսթոնի մարաթոնի ժամանակ ահաբեկչություն իրականացնելու մեջ կասկածվող Ջոհար Ցարնաևը դադարել է քննիչների հարցերին պատասխանել այն բանից հետո, երբ նրան ներկայացվել են իր սահմանադրական իրավունքները, այդ թվում՝ իր դեմ վկայություն չտալու և միայն փաստաբանի ներկայությամբ ցուցմունք տալու մասին, հաղորդում է Associated Press գործակալությունը:
Ցարնաևը դադարեցրել է համագործակցել հետաքննության հետ երկուշաբթի օրը, երբ հիվանդասենյակ են մտել դատավորը և դատախազության ներկայացուցիչը և նրան ծանոթացրել, այսպես ասած «Միրանդայի օրենքի հետ», որի համաձայն՝ հանցագործության մեջ կասկածյալը նախօրոք պետք է տեղեկանա իր իրավունքների մասին:
Մինչև իր իրավունքների մասին իմանալը, Ցարնաևը հասցրել էր խոստովանել ՀԴԲ-ին, որ ինքը եղբոր՝ Թամերլանի հետ կազմակերպել է Բոսթոնի ահաբեկչությունը: Ամենայն հավանականությամբ, այս ցուցմունքներն իրավական ուժ չեն ունենա դատական գործընթացում, սակայն հետաքննությունն առանց այդ էլ բավարար ապացույցներ ունի: Մասնավորապես, հայտնաբերվել է հրազենը, որը հանցագործներն օգտագործել են ոստիկանության հետ փոխհրաձգության ժամանակ, ինչպես նաև՝ պայթուցիկ նյութի տարրեր: