Թուրքական Cumhuriyet թերթի փոխանցմամբ՝ Անկարայում ԱՄՆ դեսպան Ջոն Բասն այցելել է (Cumhuriyet) թերթի խմբագրություն։ Դա տեղի է ունեցել թերթի գլխավոր խմբագիր Ջան Դյունդարի ու Անկարայում թերթի ներկայացուցիչ Էրդեմ Գյուլի կալանավորումից հետո։
Ջոն Բասը հայտարարել է, որ իրենք իրենց մտահոգությունն են հայտնել նրանց կալանավորման կապակցությամբ և այդ մտահոգությունը ներկայացրել են Թուրքիայի ամենաբարձրաստիճան պաշտոնյաներին։ Բասը հավելել է, որ խոսքը ոչ միայն Թուրքիայում ԱՄՆ դեսպանատան, այլև ԱՄՆ կառավարության հայտնած մտահոգության մասին է։
Բասն ընդգծել է, որ իրենք մեծ կարևորություն են տալիս ժողովրդավարական արժեքներին և հատկապես խոսքի ազատությանը։ Բասն աջակցություն է հայտնել թերթի աշխատակազմին։
Ավելի վաղ Cumhuriyet թերթը լուսանկարներ էր հրապարակել Թուրքիայի ազգային հետախուզական կազմակերպության (MIT) կողմից Սիրիա զենք ուղարկելու գաղտնի փորձի մասին։
