ԱԺ ՀԱԿ խմբակցության ղեկավար Լևոն Զուրաբյանը այսօր մամուլի ասուլիս էր հրավիրել ՀԱԿ գրասենյակում:
Ասուլիսի ընթացքում նա մասնավորապես ասաց. «Այսօր Հայաստանում ճակատագրական օր է, կայացել է ճակատագրական Հանրաքվե: Կարծում եմ՝ ոչ մեկի համար գաղտնիք չէ, այսօր բոլոր լրատվամիջոցները արդյունավետ աշխատեցին՝ բացահայտելով այն կեղծարարությունները, ընտրախախտումները, որոնք, անկասկած, կրում էին համակարգային բնույթ և պարունակում էին ընտրակեղծարարության այն ամբողջ զինանոցը, որն իշխանությունը ստեղծել է այս տարիներին: Իշխանությունը հասկանում էր, որ այս հանրաքվեում հաղթելու համար պետք է կիրառի հնարավոր և անհնարին ջանքեր: Եղան և՛ լցոնումներ, և՛ բռնություն, հանձնաժողովների աշխատանքների դադարեցում, կրկնաքվեարկություններ ID քարտերի օգտագործմամբ…
Մի նորույթ կար, որը կապված էր լրացուցիչ ցուցակների հետ: Առաջին՝ ցուցակները ուռճացված էին: Երկրորդ՝ պարզվեց, որ նույն գյուղից մոտ 100 մարդ, չգիտես ինչու, որոշել էր գալ Երանում՝ նույն ընտրատեղամասում քվեարկելու: Ակնհայտ է, որ տեղի էր ունենում հատուկ օպերացիա իշխանավոր ընտրակեղծարարների կողմից:
Մեր գնահատականներով՝ ընտրակեղծիքների ծավալը հասնում է կես միլիոն ձայնի:
Ճակատամարտը ավարտված չէ: Մենք գտնվում ենք շատ լուրջ ճակատամարտի մեջ: Բոլոր տեղամասերից դեռ տվյալները չկան, իր պարտությունը տեսնելով՝ իշխանությունը դիմում է կեղտոտ մեթոդների: Պրոպագանդիստական հնարքի են դիմել, հրապարակում են իրենց համար լավ արդյունքներ ունեցող տեղամասերի արդյունքները՝ ցույց տալով «Այո»-ի առավելությունը»:
Մանրամասները՝ տեսանյութում:
