Հունիսի 12-ին Թուրքիայում կայանալու են խորհրդարանական ընտրություններ, որին մասնակցում է երեք կուսակցություն` «Արդարություն և զարգացում», «Ազգայնական շարժում» և «Ժողովրդահանրապետական»:
Թուրքագետ Արտակ Շաքարյանը «Առաջին լրատվական»-ի հետ զրույցում նշեց, որ «Արդարություն և զարգացում» կուսակցությունը երեք օր առաջ հրատարակել է իր նախընտրական ծրագիրը. «Արտաքին քաղաքականությունում որևէ փոփոխություն այդ ծրագրում չի նախատեսվում, և նույնն է, ինչ որ կա` մասնավորապես հայ-թուրքական հարաբերությունների առումով: Կարևորվում է Ադրբեջանի հետ սերտ համագործակցությունը, հատուկ նշվում է, որ Ղարաբաղի հարցից Անկարան որևէ ետքայլ չի անելու և փորձելու է Հայաստանի հետ հարաբերությունները կառուցել հենց այդ նախապայմանով»:
Թուրքագետը նշեց, որ, ամենայն հավանականությամբ, հենց «Արդարություն և զարգացում» կուսակցությունն է հաղթելու ընտրություններում, և, բնականաբար, Թուրքիայի արտաքին քաղաքականությունը Հայաստանի հետ հարաբերություններում չի փոխվելու:
Կան կարծիքներ, որ Թուրքիայում ընտրություններից հետո հայ-թուրքական հարաբերությունների կարգավորման գործընթացը նորից կվերսկսվի:
«Հիմա մերոնք հպարտորեն ասում են, թե գնդակը Անկարայի դաշտում է, բայց խնդիրն այն է, որ Թուրքիայի խորհրդարանական ընտրություններից հետո ընտրություններ են մեզ մոտ, և արդեն մեր պատճառով հարցն առաջ չի գնա»,- նկատեց Արտակ Շաքարյանը:
Նա նաև նշեց, որ թեև «Արդարություն և զարգացում» կուսակցության հաղթանակի հավանականությունը մեծ է, սակայն Թուրքիայում նաև ազգայնականների կտրուկ աճ կա, ինչն էլ նշանակում է, որ «Ազգայնական շարժում» կուսակցությունը բավական ձայներ կարող է ունենալ խորհրդարանում, և այդ դեպքում Հայաստանի հետ հարաբերությունները կարգավորելն այնքան էլ հեշտ չի լինի:
«Բացի այդ, Էրդողանն իր կուսակցության լիակատար հաղթանակից հետո պլանավորում է պատրաստվել հաջորդ տարվան, երբ Թուրքիայի պատմության մեջ առաջին անգամ տեղի են ունենալու նախագահական ընտրություններ»:
Այդուամենայնիվ, թուրքագետի գնահատմամբ, 2015-ի հոգեբանական շեմը հաշվի առնելով, Թուրքիան ինչ-ինչ քայլեր կանի՝ մեղմելու հայ-թուրքական հարաբերությունների լարվածությունը, որպեսզի հաղթահարի այդ շեմը: