ԱՄՆ Հետախուզությունների դաշնային բյուրոն (FBI) սկսել է հետաքննություն Twitter սոցիալական ցանցում Associated Press գործակալության օգտահաշիվը կոտրելու փաստով, որտեղ հաղորդագրություն է տեղադրված եղել Սպիտակ տանը «տեղի ունեցած պայթյունների մասին», հաղորդում է Reuters գործակալությունը:
Տեղեկատվությունն այն մասին, որ հետաքննությունն արդեն սկսված է, լրագրողների հետ հանդիպման ժամանակ հաստատել է FBI-ի պաշտոնական ներկայացուցիչ Ջենի Շիրերը։ Այլ մանրամասներ նա չի ներկայացրել:
Ցանցահենները @AP Twitter հաշիվը կոտրել են երեքշաբթի երեկոյան (Երևանի ժամանակով), որից հետո հաղորդագրություն է տարածվել այն մասին, որ Սպիտակ տանը տեղի է ունեցել երկու պայթյուն, և որ ԱՄՆ նախագահ Բարաք Օբաման վիրավորվել է: Հաղորդագրությունն անմիջապես հերքվել էր ինչպես գործակալության, այնպես էլ ԱՄՆ նախագահի աշխատակազմի կողմից: Այնուամենայնիվ, տեղեկատվությունը տարածել էին մի շարք լրատվական գործակալություններ:
Գործակալության օգտահաշիվը կոտրելու պատասխանատվությունը ստանձնել է «Սիրիական էլեկտրոնային բանակ» խմբավորումը, որն աջակցում է Սիրիայի նախագահ Բաշար Ալ-Ասադի կառավարությանը: Ավելի վաղ խումբը խոստովանել էր, որ կոտրել է BBC-ի, Al-Jazeera-ի և Agence France-Presse-ի օգտահաշիվները:
