Իսրայելի խորհրդարանը երեքշաբթի քննարկումներ է անցկացրել 1915 թվականին թուրքերի կողմից իրականացված հայերի զանգվածային սպանությունների շուրջ, չնայած այն բանին, որ հրեական պետությունն ու Անկարան առաջին քայլերն են անում՝ փորձելով վերականգնել կապերը: Այս մասին հայտնում է The Daily Star-ը:
«Ժամանակն է, որ Իսրայելը ճանաչի հայերի կոտորածը, ինչպես 27 այլ պետություններ»,- ասել է ընդդիմադիր «Մերեց» կուսակցությունից Զեհավա Գալոնը, որն էլ նախաձեռնել էր քննարկումը:
Խորհրդարանական քննարկումը տեղի է ունեցել մեկ օր անց այն բանից, երբ Անկարայում Թուրքիայի և Իսրայելի միջև բանակցություններ են սկսվել՝ 2010-ին դեպի Գազայի հատված ուղևորվող Մավի Մարմարա նավի վրա իսրայելցիների իրականացրած «ռեյդի» հետևանքով զոհված Թուրքիայի 9 քաղաքացիների հարազատներին փոխհատուցում տրամադրելու հարցով:
Իսրայելի խորհրդարանը տարիներ շարունակ լսումներ է անցկացրել ապրիլի 24-ին, սակայն 2007 թվականին մերժել է թուրքերի կողմից հայերի զանգվածային սպանդը ճանաչել որպես Ցեղասպանություն: Երբ Թուրքիայի հետ Իսրայելի հարաբերությունները ջերմ էին, քննարկումներ անցկացնելու օրենսդիրների առաջարկները մերժվել են Իսրայելի կառավարության կողմից:
Գալոնի կարծիքով՝ հաշտեցման բանակցությունները չպետք է ազդեն հայերի կոտորածի ճանաչման վրա:
Կնեսետի անդամ Ռովեն Ռիվլինը՝ վարչապետ Բենիամին Նեթանյահուի աջակողմյան «Լիկուդ» կուսակցությունից, շեշտել է, որ Թուրքիայի հետ կապերն ու հաշտեցումը կարևոր են իրենց համար:
Նա նաև նախազգուշացրել է, որ այլ ժողովրդի աղետը անտեսելը կարող է թուլացնել Իսրայելի դիրքորոշումը Հոլոքոստի վերաբերյալ:
«Դա մեր բարոյական պարտականությունն է՝ որպես մարդ և որպես հրեա»,- ասել է Կնեսետի նախկին խոսնակը: Նրա խոսքով՝ եթե իրենք արհամարհեն այլ ազգի աղետը, ապա չեն ունենա բարոյական իրավունք՝ այլ ազգերից պահանջելու հիշել իրենցը:
