Մասամբ ՀՀ կառավարությանը պատկանող «Հայկական բերքի առաջմղման կենտրոն» ՓԲԸ-ն նոր պահանջ է ներկայացրել Երևանի նախկին ոստիկանապետ Ներսիկ Նազարյանի որդու հիմնադրած «Բիզնես լիդեր գրուպ» ընկերության դեմ:
Նշենք, որ ՀՀ կառավարությունը «Հայկական բերքի առաջմղման կենտրոն» ՓԲԸ-ում 49 տոկոս բաժնեմաս ունի, և որի կառավարումը իրականացնում է Սերժ Սարգսյանի գլխավոր խորհրդական Արամ Ղարիբյանը:
Նախկին ոստիկանապետի տղայի ընկերության սնանկության գործով դատական նիստը նշանակվել է դեկտեմբերի 11-ին Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում:
Երևանի նախկին ոստիկանապետ Ներսիկ Նազարյանի որդուն՝ Արման Նազարյանին պատկանող «Բիզնես լիդեր հոլդինգ» ընկերությունը Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի վճռով սնանկ է ճանաչվել դեռ ամիսներ առաջ։ Ընկերությունը սնանկ է ճանաչվել «Ամերիա» բանկի պահանջով։
Հոլդինգը իր մեջ ներառում է երեք բրենդներ՝ «Մոսկվիչկա» սուպերմարկետների ցանցը, «Վերանդա» ռեստորանային համալիրը և էքսկլյուզիվ ապրանքների ներմուծմամբ զբաղվող «Ֆուդ լիդեր» ընկերությունը։
Սակայն հարց է, թե սնանկացման արդյունքում պարտատերերը կկարողանա՞ն հետ ստանալ իրենց պարտքը։ Մեր տեղեկություններով՝ այս պահին «Բիզնես լիդեր հոլդինգ» ընկերությունը միայն մեկ անշարժ գույք ունի իր հաշվին գրանցած, այն է՝ Մարգարյան ինստիտուտի նախկին ճաշարանի տեղում գործող կահույքի խանութի շենքը։
Հիշեցնենք, որ «Մոսկվիչկա» սուպերմարկետները սկսեցին փակվել հենց Ներսես Նազարյանի պաշտոնանկությունից հետո՝ 2013 թվականի մայիսից սկսած:
Մամուլում գրվել է, որ նախկինում Նազարյանի որդուն պատկանող «Վերանդա» սրճարանը ձեռք է բերել տրանսպորտի և կապի նախարար Գագիկ Բեգլարյանը:
