Սահմանադրական հանրաքվեին հաշված օրեր են մնացել, Չարենցավանում, սակայն, դեռ «ոչ»-ի շտաբ չկա, «այո»-ի շտաբն էլ փակ է օրվա տարբեր ժամերին: Չնայած ցուրտ եղանակին՝ քաղաքի հրապարակներից մեկում հարյուրից ավելի տղամարդ հավաքված՝ թղթախաղով են զբաղված:
Նրանք կեսկատակ-կեսլուրջ ասացին, որ իրենք են «ոչ»-ի շտաբը: Չարենցավանցիներից մեկն էլ անկեղծացավ. «ոչ»-ի շտաբը գիտեք ինչու չկա. քաղաքապետը բոլոր ընդդիմադիրներին կանչել ա, ասել՝ էսքան փող կտանք, մենակ մեր «այո»-ն շատ լինի»:
Բնակիչները վստահ են, որ 90 տոկոսը «ոչ» է ասելու Սահմանադրությանը, բայց, ինչպես միշտ, իշխանությունը «այո»-ն կանցնացնի, «եթե ոչ էլ ասենք, հաղթելու ա նա, ով հաղթելու ա»:
78-ամյա Սաշիկ Սարգսյանը «Առաջին լրատվական»-ի հետ զրույցում ասաց, որ այնքան սուտ են լսել, որ ճշտին էլ չեն հավատում, չարենցավանցիները անհույս են վաղվա օրվա նկատմամբ: Մյուս կողմից էլ, թե՛ իշխանության և թե՛ ընդդիմության նկատմամբ վստահություն չկա:
«Ո՛չ սրան են հավատում, ո՛չ էլ նրան, ի՞նչ անի խեղճ ժողովուրդը: Ժողովուրդը ո՛չ սրան, ո՛չ նրան են հավատում, անհույս վիճակում են. «այո» ասեն, մեկ է՝ ոչ մի բան չի դզվի»,- ասաց տարեց մի չարենցավանցի: «Ի՞նչն էր խանգարում իրենց, որ չեն բարելավում ժողովրդի վիճակը: Սերժի՛ն պետք է փոխել, ոչ թե սահմանադրությունը: Բոլորս միաձայն «ոչ»-ի կողմնակիցներ ենք, բայց էլի իրանց խարդախությունը պիտի անցնի: Խի ընտրությւոնների վախտ չե՞նք տեսել՝ ինչ ա եղել»,- ասում են մարդիկ:
Չարենցավանցիներն ասացին, որ այս անգամ էլ ընտրական լավագույն ավանդույթները կշարունակվեն. «Ես իմ աչքով տեսել եմ. Սերժի ընտրության ժամանակ 400-500 գցել են, ոչ ոք ձեն չի հանել, խոսաս՝ կտան կսպանեն»:
Նրանք վստահ են, որ Սերժ Սարգսյանը սահմանադրական փոփոխությունները նախաձեռնել է իր իշխանության երկարաձգման համար: «Նորից եմ ասում՝ Ալիբաբաները նորից առա՞ջ պիտի գնան, բայց խի՞: Թող առաջ Սերժը հրաժարական տա, 40 տարի էշություն եմ արել, որ էսօր 32000 դրամ ստանամ, որպես ի՞նչ»: «Գնամ Ռուսաստան էլի, մնամ ըստեղ՝ ի՞նչ անեմ, ընձի ձեռ չի տալիս ստեղ, թանկ ա, գործ չկա: Ռուսաստան ավելի լավ ա. փողը կա, աշխատանքը կա»,- նշեց բնակիչներից մեկը: Մյուսը հավելեց. «Իրա ազգի նկատմամբ սպիտակ եղեռնը ստեղծել ա, թուրքին ասում ա՝ չեն ընդունել: Ինքն ա եղեռն անում. արդեն երկուսկես միլիոն հայ ա գնացել արտասահման: Մարդկանց իրանց հողից, իրանց ջրից հանում ա»:
Չարենցավանի քաղաքապետ Հակոբ Շահգալդյանը չժխտեց, որ հանրաքվեի նկատմամբ պասիվություն կա, ինչը ուղեկցվում է անտարբերությամբ: Քաղաքապետը նշեց, որ աշխատանքներ են տանում յուրաքանչյուր չարենցավանցու հետ՝ «այո» ապահովելու համար:
«Չարենցավանցիները, նախ, վախենալու խնդիր չունեն, մենք էլ վախեցնելու խնդիր չունենք: Էստեղ էդպիսի լուրջ խնդիր դրված չէ, որ պետք է էսքան «այո» լինի կամ «ոչ» լինի: Մենք փորձում ենք այնպես աշխատել, որ կարողանանք հաղթել, հիմա որ չստացվի, հո մեզ չե՞ն կախելու, ինչի՞ մասին ա խոսքը»,- նշեց քաղաքապետը:
Այնուամենայնիվ, ընդդիմադիր չարենցավանցիները դեկտեմբերի 1-ից միանալու են Ազատության հրապարակի հանրահավաքին և տուն չեն գնալու: Նրանք հույս ունեն, որ ընդդիմությունը գոնե այս անգամ կհաջողի:
