Cherry ռեստորանային համալիրում «Բարգավաճ Հայաստան» կուսակցության քարոզարշավի ընթացքում ելույթ ունեցավ նաև կուսակցության ավագանիների ցուցակը գլխավորող Վարդան Օսկանյանը, ով իր ելույթով «ստորագրեց» Նաիրա Զոհրաբյանի հայտարարությունների տակ:
Նախկին արտգործնախարարն իր ելույթում մասնավորեցրեց երեք կետ: Առաջին․ «Նախագահական ընտրությունների արդյունքում, իսկ մենք բոլորս լավ գիտենք թե այդ արդյունքներն ինչ են նշանակում, կան պաշտոնական, կան նաև ինչ-որ տեղ ոչ պաշտոնական տվյալներ, որովհետև մեզ մոտ ընտրությունները միշտ լինում են խախտումներով, դա արձանագրում ենք բոլորս, նաև դիտորդները, բայց նույնիսկ պաշտոնականից դատելով՝ մի մեծ զանգված՝ 500․000, ընդհանրապես չի մասնակցել, 600․000 բողոքական հատված կա, որ պահանջում է փոփոխություն՝ սա փաստ է: Փաստ է այն, որ կա Հայաստանում արմատական, համակարգային փոփոխություններ կատարելու պահանջ»,- հայտարարեց Օսկանյանը՝ մոռանալով սակայն, որ այդ նույն, ինչպես ինքն է ասում՝ միշտ «խախտված» ընտրությունների արդյունքում «Բարգավաճ Հայաստանը» կոալիցիա կազմեց իշխող կուսակցության հետ:
Երկրորդ կետը, որն առանձնացրեց Օսկանյանը, այն էր, որ Հայաստանի բնակչության 40 տոկոսը պատրաստ է լքել երկիրը առաջին իսկ հնարավորության դեպքում:
Երրորդ․ «Վերանշանակվեց վարչապետը. սա ի՞նչ է նշանակում. նշանակում է՝ ամեն ինչ լավ է մեր երկրում: Եկեք համադրենք՝ ժողովուրդը պահանջում է փոփոխություն, իշխանություններն ասում են՝ ամեն ինչ լավ է, մենք լավ ենք ապրում, մենք փոխելու կարիք չունենք: Հետաքրքրական է, որ վարչապետի վերանշանակումը բացատրվում է ոչ թե նրանով, որ ասենք՝ մենք գիտենք, որ խնդիր կա, բայց ավելի լավ կաշխատենք, բացատրությունն այն է, որ կառավարության առջև դրված խնդիրը լուծված է, և այդ խնդիրը, գիտե՞ք, որն է՝ 6 ամիս առաջ նախագահն ասաց 7 տոկոս տնտեսական աճ պետք է ապահովել, և իրենք էլ ապահովեցին՝ թղթի վրա, սակայն աղքատությունը չնվազեց, աշխատավարձերը չավելացան»,- ասաց նա:
Օսկանյանի կարծիքով՝ այս ամենը շտկելու առաջին հնարավորությունը Երևանի քաղաքապետի ընտրություններն են: Նա ներկաներին կոչ արեց ընտրել ոչ իշխանական ուժի՝ իհարկե նկատի ունենալով իրենց կուսակցությունը:
Տեսանյութը՝ ավելի ուշ:
