Մեծ Բրիտանիայի իշխանությունները մտահոգություն ունեն, որ ահաբեկիչների նոր թիրախ կարող են դառնալ Լա-Մանշի նեղուցով իրականացվող երթուղիները սպասարկող նավահանգիստները: Այս մասին տեղեկացնում է The Telegraph-ը՝ հղում անելով Լոնդոնի բարձրաստիճան աղբյուրին:
Ինչպես ենթադրում է Մեծ Բրիտանիայի նախարարների կաբինետը՝ օդանավակայաններում անվտանգության միջոցառումների խստացման պատճառով նավահանգստային անցումները դարձել են ահաբեկիչների համար գրավիչ թիրախ: Լրատվամիջոցի զրուցակիցը հայտնել է, որ ավտոմեքենաները նավահանգիստ մտնելիս ընտրողաբար ստուգման են ենթարկվում: Բացի դրանից, միայնակ ահաբեկչի համար շատ հեշտ է ուղևորների մեջ թաքնվելը, ուստի նրանք կարող են հասցնել սպանություններ իրականացնել մինչ հատուկջոկատայինների՝ նավին մոտենալը:
Մեծ Բրիտանիայի իշխանությունները ահաբեկչության դեպքում երթևեկության միջոցների համար նախապատրաստել են անվտանգության նոր կանոններ: Գնացքների և նավերի բոլոր ուղևորները մինչ մեկնելը պարտավոր են ծանոթանալ դրանց հետ:
