Ինչպես հայտնի է, 2015 թվականի նոյեմբերի 12-ին` ժամը 21:25-ին, Գյումրու «Ավստրիական» հիվանդանոցից ահազանգ է ստացվել, որ դանակահարվել է Շիրակի մարզի անչափահաս բնակիչ՝ 17-ամյա Վ. Ղ.-ն:
Ինչպես «Առաջին լրատվական»-ին փոխանցեցին Գյումրու «Ավստրիական մոր ու մանկան առողջության կենտրոնից», դեռահասի մոտ ախտորոշվել է որովայնի ձախ կողմնային մակերեսի ծակված-կտրած չթափանցող վերք, արնահոսություն, ենթամաշկային հեմատոմա, և ցուցաբերվել է անհրաժեշտ բուժօգնություն: Բժիշկները դեռահասի վիճակը գնահատում են կայուն:
Նշենք, որ նույն հիվանդանոցի դատական դեպքերի մատյանի զննությամբ պարզվել է, որ անչափահասը հայտարարել է, թե դաշտում կաղամբ հավաքելիս ընկել է և ձեռքի դանակով վնասվել: Մինչդեռ անչափահաս տղայի հայրը, ըստ ՀՀ քննչական կոմիտեի տեղեկությունների, գրավոր հաղորդում է տվել, որ տղային դանակով հարվածել ու մարմնական վնասվածք է պատճառել իրենց համագյուղացի մի տղա, ով ևս անչափահաս է: Վերջինիս ինքնությունը պարզվել է:
ՀՀ քննչական կոմիտեի Շիրակի մարզային քննչական վարչության Ախուրյանի քննչական բաժնում դեպքի առնչությամբ տարվում է քննություն, հընթացս որի վերցվել են դեպքի պահին երկու անչափահասների հագին եղած հագուստները, և նշանակվել են մի շարք փորձաքննություններ՝ դատաբժշկական և քրեագիտական:
