Համաշխարհային տնտեսությունում իրադրությունն ավելի կայունացել է: Այս մասին է ասվում ԱՄՀ-ի այսօր հրապարակած կանխատեսման մեջ:
«Տնտեսական ակտիվությունը 2012 թ. դանդաղումից հետո սկսվում է վերականգնվել»,- ասվում է զեկույցում, որը ներկայացվել է այս շաբաթ Վաշինգտոնում կայանալիք Համաշխարհային բանկի և ԱՄՀ-ի ղեկավար մարմինների նիստի նախաշեմին: Փաստաթղթում ասվում է, որ իրադրությունը «կայունացել է զարգացած երկրներում և բարելավվում է զարգացող երկրներում»:
ԱՄՀ-ի մասնագետներն առանձնացրել են «եվրոպական պետությունների ձեռնարկած լուրջ միջոցառումները, որոնք ուղղված են վստահության մակարդակի բարձրացմանը և ֆինանսական պայմանների բարելավմանը»: Նշվում է նաև, որ «ԱՄՆ-ը խուսափել է ֆինանսական անկումից, սակայն չի կարողացել բյուջետային այլ խնդիրների վերաբերյալ վստահելի լուծումներ մշակել»:
Այս ամենը հիմնադրամի փորձագետներին հնարավորություն է տվել եզրակացնել, որ 2013 թ. համաշխարհային տնտեսությունը ծրագրվածից ավելի դանդաղ կզարգանա: Թարմացված տվյալների համաձայն՝ համաշխարհային ՀՆԱ-ի աճի ցուցանիշներն այս տարի պետք է 3,3 տոկոս կազմեն: Դա ԱՄՀ-ի հունվարյան կանխատեսումներից 0,2 տոկոսով ցածր է:
Իսկ 2014 թ. համար արված կանխատեսումներն անփոփոխ են մնացել. ինչպես 4 ամիս առաջ, այնպես էլ այժմ այն 4 տոկոս է կազմում:
Ընդհանուր առմամբ, ԱՄՀ-ի մասնագետները կարծում են, որ համաշխարհային տնտեսությունն աստիճանաբար կվերականգնվի:
ԱՄՀ-ի մասնագետները խոստովանում են, որ չնայած 2012 թ. համեմատ իրադրությունը բարելավվել է, «համաշխարհային տնտեսության դեպի վերականգնում տանող ճանապարհը դեռ քարքարոտ է մնում»: Մասնավորապես, նրանց կարծիքով, վերջին ժամանակներս ձեռնարկված միջոցառումները նվազեցրել են ակնթարթային ռիսկերի առաջացման վտանգները թե՛ ԱՄՆ-ում, թե՛ Եվրոպայում՝ թեև իրադրությունն այս երկու տարածաշրջաններում էապես տարբերվում է:
Սրա հետ մեկտեղ ԱՄՀ-ի մասնագետները նշել են, որ համաշխարհային արժեզրկման մակարդակը 2012թ. սկզբի հետ համեմատած նվազել է 3,25 տոկոսով: Նրանց կարծիքով, այն գրեթե այդպիսին կմնա նաև 2014թ.: