Ինչպես հայտնում է Gazeta.ru կայքը` հղում անելով GayRussia.ru կայքին, Մոսկվայի իշխանությունները թույլատրել են գեյ-շքերթի անցկացում:
«Մոսկովյան գեյ-շքերթ. նույնասեռականները՝ համաշխարհային մշակույթի և քաղաքակրթությունների պատմության մեջ» անվանումով ակցիան տեղի կունենա մայիսի 28-ին Մոսկվայի Բոլոտնայա հրապարակում»,- ասվում է հաղորդագրության մեջ:
Կայքը հայտնում է, որ «միջոցառումը նպատակ ունի հասարակությանը ներկայացնել մշակույթի և գիտության մեջ նույնասեռականների մասնակցության մասին օբյեկտիվ տեղեկություն, հայտնի համասեռամոլների ներդրումը մշակույթի և գիտության մեջ, ինչպես նաև մշակույթի և գիտության հայտնի ներկայացուցիչների դերը նույնասեռականների պաշտպանության գործում»,- նշված է տեքստում:
Ռուս գեյ-ակտիվիստները դեռ ապրիլի 12-ին հայտարարել էին մայիսի վերջին Մոսկվայում «զանգվածային մշակութալուսավորչական ֆորմատով ակցիա» իրականացնելու մասին:
Նախկին քաղաքապետ Յուրի Լուժկովի ժամանակ շքերթ անցկացնելու բոլոր հայցերը մերժվել էին, իսկ Լուժկովն էլ հայտնի էր նույնասեռականների դեմ իր հայտարարություններով:
«Սոբյանինը յուրահատուկ հնարավորություն ունի վերջակետ դնելու այս հարցում և չգնալու Լուժկովի ճանապարհով»,- ավելի վաղ հայտարարել էր գեյ-շարժման ղեկավարներից Նիկոլայ Ալեքսեևը` հիշեցնելով, որ Սոբյանինի` քաղաքապետի պաշտոնին անցնելուց հետո ընդդիմության հավաքները սկսեցին արտոնվել:
