Զենք ունենալու և կրելու ամերիկյան քաղաքացիական կոմիտեն աջակցել է զենք գնողներին ստուգելու նոր օրինագիծը՝ ի տարբերություն ազգային հրաձգային ասոցիացիայի, որը ԱՄՆ-ում հրազենային լոբբիի առավել խոշոր ներկայացուցիչն է:
Փաստաթուղթը անցած շաբաթ համաձայնեցվել էր դեմոկրատ սենատոր Ջո Մանչինի և հանրապետական Պատրիկ Թումիի կողմից: Սենատը կարող է օրինագծի վերաբերյալ քվեարկությունը անցկացնել այս շաբաթվա կեսերին՝ հայտնում է RIA Novosti-ն:
«Եթե կարդաք Մանչին-Թումիի ուղղումը, կտեսնեք, թե ինչպիսի առավելություններ ունի այն մեզ համար, օրինակ՝ այլ նահանգում զենքի վաճառքի հնարավորությունը, վետերանների իրավունքների վերականգնումը, զենքով ճանապարհորդելու իրավունքը և այլն»,-ասվում է կոմիտեի նախագահ Ալան Գոտլինի տարածած հայտարարության մեջ:
Զենք ունենալու և կրելու քաղաքացիների կոմիտեն միավորում է ավելի քան 600 հազար մարդու, մինչդեռ Ազգային հրաձգային ասոցիացիան՝ 5 մլն: Մինչ օրս հրազենային լոբբին հանդես էր գալիս միասնական ճակատով: