Հայաստանում ավիացիայի աղետալի վիճակը ստիպում է մեր լավագույն մասնագետներին, օդաչուներին աշխատանք փնտրել դրսում, այդ թվում՝ աֆրիկյան երկրներում, որտեղ և նախօրեին տեղի ունեցած ավիավթարում զոհվեց 5 հայ օդաչու։
Ավիատրանսպորտային էսկադրիլիայի հրամանատար Գագիկ Գալստյանը ճանաչում է բոլոր զոհվածներին, բոլորն էլ փորձված, հմուտ օդաչուներ են եղել։ Բառացիորեն մեկ ամիս առաջ էր հանդիպել, զրուցել նրանց հետ։ Բորտ-ինժեներ Սամվել Մկրտչյանը զրույցի ժամանակ ուրախությամբ նշել է, որ պայմանագիրը ստացվում է, գնալու է։
Գալստյանի խոսքով՝ մեր օդաչուները մշտական աշխատանքի չեն մեկնում։ Մոտավորապես 100 ժամվա պայմանագիր են կնքում կոնկրետ ավիաընկերության հետ և պայմանագրի ավարտից հետո կրկին հետ են վերադառնում։
Հրամանատարը փաստում է՝ Սուդանում կործանված ռուսական «Ան-12» բեռնատար օդանավը հին օդանավ է, 30-40 տարվա պատմություն ունի և հիմա էլ չի արտադրվում։ Դրա համար ռիսկերը շատ են։ Գալստյանն ինքն է բազմաթիվ թռիչքներ իրականացրել Աֆրիկայում և խոսելով ավիավթարի մասին՝ 3 վարկած է առաջ քաշում՝ բեռները օդանավում լավ չամրացնելուց մինչև անսարքություն։
Փորձառու օդաչուն փաստում է՝ աֆրիկյան երկրներում ռիսկերը շատ են։ Օդանավերը շատ հաճախ անհրաժեշտ տեխզննում չեն անցնում, ինչն էլ մեծացնում է վթարի հավանականությունը։
Օդաչուի 7 տարվա աշխատանքային փորձ ունեցող Միքայել Մանուկյանն աշխատում է Հայաստանում, սակայն լավ առաջարկ ստանալու դեպքում հաստատ կմեկնի, բայց ոչ աֆրիկյան երկրներ։ Սակայն Միքայելը չի էլ քննադատում աֆրիկյան երկրներ աշխատանքի մեկնող իր կոլեգաներին։
Արտասահմանյան երկրներում տեղյակ են մեր օդաչուների համբավի մասին։ Դրա համար էլ աշխատանքի լավագույն առաջարկները հենց նրանց են ուղղվում։
Միքայելը մեզ հետ զրույցում չխոսեց պատճառների մասին, թե ինչու ավիացիայի ոլորտը Հայաստանում այսօրվա վիճակին հասավ։ Փոխարենը Գալստյանը խոսեց։ Աշխատատեղ, օդաչու ունենալու համար նախ օդանավ է հարկավոր։
45 տարվա աշխատանքային փորձ ունեցող, հարյուրավոր թռիչքներ իրականացրած խորհրդային տարիների լավագույն օդաչու համարվող, հրամանատար Կոնստանտին Ավետիսյանն էլ տեսախցիկից այն կողմ խոստովանում է՝ ավիացիայի ոլորտի ավերման պատճառն այն ժամանակվա իշխանություններն էին, իսկ տեսախցիկի դիմաց մատնանշում է՝ ոլորտի մասնավորեցումը դրեց քայքայման սկիզբը։
Որպես ոլորտի առողջացման միակ ճանապարհ՝ Գագիկ Գալստյանը համարում է ներդրումը, որը թեկուզ տևական ժամանակ շահույթ չի ենթադրի։
