Ընդհանուր իրավասության դատարանում քննվում է 37-ամյա տղամարդու գործը, ով մեղադրվում է իր հետ փաստական ամուսնական հարաբերությունների մեջ գտնվող կնոջ անչափահաս երեխաների նկատմամբ կատարած հանցավոր արարքների համար:
Ըստ մեղադրանքի՝ Վ. Ս.-ն, օգտագործելով մոր հետ իր մոտ ապրող, 2003 թվականին ծնված տղայի նկատմամբ ունեցած իր վերահսկող դիրքը, հեղինակությունը, 2013 թվականի նոյեմբերից մինչև 2014 թվականի գարունն ընկած ժամանակահատվածում նրան ստիպել է իրենց քաղաքում զբաղվել մուրացկանությամբ, ապա տղայից ստացել ու անձնական կարիքների համար ծախսել է նրա հավաքած ամբողջ գումարները:
Այս դրվագով Վ. Ս.-ն մեղադրվում է ՀՀ քրեական օրենսգրքի 132.2 հոդվածի 1-ին մասով:
Բացի այդ, ըստ մեղադրանքի, Վ. Ս.-ն իր հետ ապրող կնոջ անչափահաս՝ 2000 թվականի դեկտեմբերին ծնված դստեր նկատմամբ 2013 թվականի օգոստոսից մինչև 2014 թվականի դեկտեմբերի 29-ը պարբերաբար կատարել է անառակաբարո գործողություններ՝ «անպարկեշտ ձևով հպվել է նրա մարմնի տարբեր մասերին, շոյել է կուրծքն ու սեռական օրգանը» և այլն: Այս դրվագով Վ. Ս.-ն մեղադրվում է ՀՀ քրեական օրենսգրքի 142 հոդվածի 2-րդ մասի 3-րդ, 4-րդ կետերով:
Աղջկա 14 տարին լրանալուց հետո էլ Վ. Ս.-ն շարունակել է նրա նկատմամբ պարբերաբար անառակաբարո գործողություններ կատարել 2014 թվականի դեկտեմբերից մինչև 2015 թվականի մայիս ամիսը: Այս դրվագով Վ. Ս.-ն մեղադրվում է ՀՀ քրեական օրենսգրքի 142 հոդվածի 2-րդ մասի 2-րդ, 4-րդ կետերով:
Այս անչափահաս աղջկա նկատմամբ անառակաբարո գործողություններ կատարելու հարցով 2013 թվականի նոյեմբերի կեսին Վ. Ս-ն վիճել է աղջկա քրոջ՝ նույնպես անչափահաս՝ 1996 թվականի մարտին ծնված աղջկա հետ, վերջինիս պատժելու դիտավորությամբ ապօրինի զրկել է ազատությունից՝ մի գիշեր պահել է տան նկուղում:
Այս դրվագով Վ. Ս.-ն մեղադրվում է ՀՀ քրեական օրենսգրքի 133 հոդվածի 2-րդ մասի 4-րդ կետով:
Վ. Ս.-ն կալանքի տակ է:
