Էկրանից այս կողմ հայ խաղաղապահների ընտանիքի անդամներն ու բարեկամներն են, մյուս կողմում` Կոսովոյում և Աֆղանստանում ծառայություն իրականացնողները: Հանդիպումը ՀՀ արտաքին գործերի նախարարությունում էր, «ՆԱՏՕ-ի շաբաթ»-ը Հայաստանում ծրագրի շրջանակում: «Արմենպրես»-ի հետ զրույցում խաղաղապահ առաքելությանը մասնակցող զինծառայողների ընտանիքի անդամները միայն մեկ բան են ցանկանում` խաղաղություն: Ասում են` տեսազանգերը որոշ չափով մեղմում են կարոտը, բայց միևնույն է` անհանգստությունը երբեք չի անցնում:
«Մտովի նրանց հետ ենք: Ի՞նչ արեցին, ի՞նչ կերան, ի՞նչ իրավիճակում են և այլն: Իհարկե անհանգստություն կա, բայց մյուս կողմից նաև հպարտություն կա, երբ քո որդին ծառայում է որպեսզի աշխարհում խաղաղություն լինի, որ հարևան երկրի բալիկն էլ հանգիստ քնի»,- ասում է տիկին Անահիտը:
Մինչ հարազատների հետ շփումը խաղաղապահներին և նրանց հարազատներին տեսակապով ողջունեց ՀՀ Պաշտպանության նախարար Սեյրան Օհանյանը: «Երբ խոսում ենք Հայաստան-ՆԱՏՕ հարաբերությունների մասին, առաջին հերթին դա պայմանավորված է ձեզանով և ձեր առաքելությամբ, ձեր նվիրական ծառայությամբ: Դուք ներկայացնում եք հայ զինվորի հավաքական կերպարն ու հայ զինվորին հարիր արժեհամակարգ և արհեստավարժություն ցուցադրում»,- ասաց Օհանյանը` հավելելով, որ խաղաղապահների ծառայության կարևորությունը չի իջեցվում, քանի որ նրանք նպաստում են համաշխարհային անվտանգ ության ապահովմանը:
Հայաստանում Ֆրանսիայի դեսպան Ժան-Ֆրանսուա Շարպանտիեն էլ, կարևորելով հայ խաղաղապահների առաքելությունը, շեշտում է, որ միջազգային հանրությունն ու յուրաքանչյուր երկիր պետք է իր լուման ունենա աշխարհով մեկ որդեգրած խաղաղապահության հաջող կառավարման գործընթացին:
Հայաստանում ԱՄՆ դեսպան Ռիչարդ Միլսն էլ շեշտում է, որ հայ խաղաղապահները լավագույն կերպով են ներկայանում և ծառայում: «Ձեզ անվտանգ ծառայություն և շուտափույթ վերադարձ»,- ասաց դեսպանը: