Շիրակի մարզի ընդհանուր իրավասության դատարանում Վարդան Գրիգորյանի նախագահությամբ ավարտվել է Սամվել Գ.-ի գործի դատական քննությունը:
Ըստ մեղադրանքի՝ 41-ամյա Սամվելը 2014 թվականի դեկտեմբերի 5-ին, ժամը 22-ի սահմաններում, գտնվելով ալկոհոլի ազդեցության տակ, տանը շատ բարձր երաժշտություն է միացրել:
Մայրը դիտողություն է արել նրան, խնդրել է ցածրացնել երաժշտության ձայնը: Սամվելը վիճել է մոր հետ, ձեռքերով հարվածներ է հասցրել մոր դեմքին, մատը մտցրել է մոր բերանը… Արդյունքում նա մոր առողջությանը պատճառել է թեթև վնաս՝ առողջության կարճատև քայքայումով:
Այս արարքի համար Սամվելին մեղադրանք էր առաջադրվել ՀՀ քրեական օրենսգրքի 117 հոդվածով:
Այնուհետև, 2015 թվականի մարտի 17-ին Սամվելը հեռախոսով խոսել է համաքաղաքացի Մ.-ի հետ, լսել է, որ նա իր նախկին կնոջ հետ սեռական հարաբերություններ է ունեցել և պարզաբանում է պահանջել նրանից:
Սամվելը տանից վերցրել է վարդագույն բռնակով խոհանոցային դանակը, գնացել է Մ.-ի հետ հանդիպման:
Գտնվելով ալկոհոլի ազդեցության տակ՝ Սամվելը վիճել է Մ.-ի հետ, քաշքշել է նրան, ապա իր մոտ եղած դանակով երեք հարված է հասցրել Մ.-ի որովայնի առաջնային պատին՝ պատճառելով որովայնի խոռոչ թափանցող վնասվածքներ և նրա առողջությանը հասցնելով ծանր վնաս:
Այս արարքի համար Սամվելին մեղադրանք էր առաջադրվել ՀՀ քրեական օրենսգրքի 112 հոդվածի 1-ին մասով:
Դատահոգեբուժական-դատահոգեբանական ստացիոնար համալիր փորձաքննությամբ հաստատվել է, որ Սամվել Գ.-ն հոգեկան հիվանդությամբ չի տառապում, նա ճանաչվել է մեղսունակ:
Նրա մոտ հայտնաբերվել է «Հոգեկան ու վարքային խանգարումներ ալկոհոլի գործածման հետևանքով» հիվանդությունը:
Հանցավոր արարքը կատարելու պահին Սամվել Գ.-ն գտնվել է ալկոհոլային հարբածության վիճակում, դրա պատճառով նրա մոտ ֆիզիոլոգիական աֆեկտի ախտորոշումը մասնագետը համարել է անհնարին:
Գործի դատական քննության ժամանակ ամբաստանյալ Սամվելն ու տուժող ճանաչված նրա մայրը հայտնել են, որ հաշտվել են իրար հետ:
Մոր առողջությանը թեթև վնաս պատճառելու մեղադրանքով Սամվելի քրեական հետապնդումը 2015 թվականի հոկտեմբերի 15-ի որոշմամբ դադարեցվել է՝ տուժողի հետ հաշտվելու հիմքով:
Գործի մյուս դրվագով՝ Մ.-ի առողջությանը դիտավորությամբ ծանր վնաս հասցնելու համար, Սամվելը դատարանում իրեն մեղավոր է ճանաչել: Գործը քննվել է արագացված կարգով:
Սամվել Գ.-ն մեղավոր է ճանաչվել ՀՀ քրեական օրենսգրքի 112 հոդվածի 1-ին մասով և դատապարտվել է 3 տարի 6 ամիս ազատազրկման:
Պատժի սկիզբը՝ 2015 թվականի մարտի 17-ից:
