Իրանի և Արևմուտքի համալիր միջուկային գործարքի իրագործումը կբարելավի Իրանի տնտեսական հարաբերությունները մյուս երկրների հետ, բայց ոչ՝ ԱՄՆ-ի: Այս մասին հայտարարել է ԱՄՆ Պետդեպարտամենտի պաշտոնական ներկայացուցիչ Ալան Էյրը՝ փոխանցում է trend.az-ը:
«Նույնիսկ պատժամիջոցները հանելուց հետո հազիվ թե ԱՄՆ-ի և Իրանի մեջև տնտեսական կապերը զգալիորեն բարելավվեն, քանի որ սկզբնական՝ ԱՄՆ-ի ոչ միջուկային պատժամիջոցները կմնան և չեղյալ չեն հայտարարվի»,- ասել է Էյրը:
Նրա կարծիքով՝ ԱՄՆ էներգետիկական ընկերությունների մեծ մասը, ինչպես նախկինում, չի կարող մտնել իրանական շուկա՝ չնայած եվրոպական պատժամիջոցները հանելուց հետո Իրանի տնտեսությունը կարող է ավելի մեծ ծավալով համագործակցել համաշխարհային տնտեսության հետ:
Նրա խոսքով՝ հոկտեմբերի կեսերից միջուկային գործարքի կողմերը սկսել են քայլեր ձեռնարկել համատեղ միջոցառումների ծրագրի (JCPOA) իրագործման ուղղությամբ: Պատասխանելով միջուկային գործարքի ապագայի վերաբերյալ հարցին՝ Պետդեպի ներկայացուցիչն ասել է, որ այն լավ հեռանկարներ ունի, եթե բոլոր կողմերը կատարեն իրենց պարտավորությունները:
