Թուրքական Hürriyet Daily News and Economic Review թերթի փոխանցմամբ, Ստամբուլի համալսարանի լեզվի կենտրոնը միջնակարգ դպրոցի շրջանավարտների համար կազմակերպել է հայերեն լեզվի դասընթացներ: Դա միտված է գործարար ու գիտական շրջանակների միջև տարածաշրջանային երկխոսության ամրագրմանը:
47 ժամից բաղկացած այդ դասընթացները մեկնարկելու են մայիսի վերջին: Դասընթացներին կարող են մասնակցել միջնակարգ դպրոցն ավարտած բոլոր ցանկացողները` անկախ տարիքից ու մասնագիտությունից: Այս ծրագիրը ֆինանսավորվում է գերմանական Մարշալի հիմնադրամի կողմից (23.500 դոլար):
Քադիր Հաս համալսարանի ռեկտոր Սերդար Դինլերը նշել է. «Թուրքիան քաղաքական, տնտեսական, մշակութային ու սոցիալական առումներով վերածվում է տարածաշրջանային գլխավոր խաղացողի: Դրա համար էլ մենք վճռել ենք զբաղվել տարածաշրջանային լեզուների ուսումնասիրությամբ և ոչ թե դասական օտար լեզուներով, ինչպիսիք են, ասենք, անգլերենն ու ֆրանսերենը:
Մենք ունենք բազմաթիվ գործարարներ, որոնք առևտուր են անում Հայաստանի հետ, ինչպես նաև գիտնականներ, լրագրողներ և այլք, ովքեր իրենց աշխատանքի բերումով շփում ունեն Հայաստանի հետ: Այդ հարաբերությունները կարող են առավել խորացվել, եթե վերոնշյալ մեր հայրենակիցներն ուղղակիորեն տիրապետեն հայերենին: Այդ նպատակով ԵՊՀ-ից պետք է դասավանդողներ հրավիրենք:
Այդպիսի նախագծեր մենք պատրաստել ենք նաև հունարենի ու ռուսերենի համար: Մեր նշանառության տակ են նաև արաբերենը, պարսկերենն ու քրդերենը, որոնց կենսագործման համար մենք սպասում ենք համապատասխան ֆինանսական աջակցության»:
Հիշեցնենք, որ Ստամբուլի Քադիր Հաս համալսարանը հիմնադրվել է 1997 թվականի մայիսի 28-ին:
