Գյումրիում ընթացող «Նոր Հայաստան» հանրային փրկության ճակատի իրազեկման երթի ժամանակ «Առաջին լրատվական»-ի հետ զրույցում «Ժառանգություն» կուսակցության փոխնախագահ Արմեն Մարտիրոսյանը նշեց, որ չնայած ժողովրդի մոտ առկա մի փոքր պեսիմիստական մոտեցումներին, այնուամենայնիվ, առաջին հանրահավաքին բավականին քաղաքացիներ էին մասնակցում:
Արմեն Մարտիրոսյանի հավաստմամբ՝ «քանի որ իշխանությունները ձախողել են բոլոր գործընթացները, խոստումներ են տվել և չեն իրականացրել, այդպիսի իշխանությունները չեն կարող վստահելի լինել քաղաքացիների համար: Նրանք համոզված են, որ այն, ինչ կատարվում է, սահմանադրության փոփոխություն չէ, այլ իշխանության վերարտադրության ավելի հեշտ մեխանիզմի կյանքի կոչում, որը իր բացասական հետևանքներն է ունենալու իրենց կյանքի վրա՝ թե՛ սոցիալական, թե՛ արդարության առումներով»:
«Ոչ»-ի ճկատների միջև, ըստ Ա. Մարտիրոսյանի, խիստ տարաձայնություններ չկան. «Ռադիկալության հարց չկա, կա մեկ խնդիր՝ հնարավորինս միասնական ուժերով տապալել սահմանադրական փոփոխությունների գործընթացը և երկրում արմատական բարեփոխումներ անել»:
