Եգիպտացիների ավելի քան կեսը ցանկանում են դադարեցնել Եգիպտոսի և Իսրայելի միջև 1979 թ. ստորագրված խաղաղության պայմանագրի գործողությունը: Այս մասին են վկայում հարցման արդյունքները, որոնք հրապարակել է Pew Research Center-ը:
Այդ հարցման համաձայն, եգիպտացիների միայն 36%-ն է կողմ պայմանագրի պահպանմանը, այն դեպքում, երբ 54%-ն արտահայտվել է դրա դադարեցման օգտին: Այս մասին հաղորդում է MIGNews.com կայքը: Հարցումը ցույց է տալիս, որ խաղաղության գործընթացն էլ բավական ոչ պոպուլյար գործընթաց է այդ երկրում: Ընդ որում, այս թվերը տարբերվում են` կապված հարցվածների եկամուտներից: Օրինակ՝ ցածր եկամուտ ունեցող եգիպտացիների 60%-ն է դեմ պայմանագրին, այնինչ բարձր եկամուտով եգիպտացիների մեջ այդ թիվը կազմում է 45%, որը, այդուհանդերձ, նույնպես ցածր ցուցանիշ չէ:
Հարցումն անցկացվել է մարտի վերջին, ապրիլի սկզբին, երբ բարձր են եղել տպավորությունները փետրվարյան հեղափոխությունից: Թերևս այդ է պատճառը, որ եգիպտացիների մեծամասնությունը լավատեսորեն է տրամադրված իրենց երկրի ապագայի նկատմամբ:
