«Արարատ» ամսագրի գլխավոր խմբագիր, Երևանի ավագանու «Բարև Երևան» դաշինքի 12-րդ հորիզոնականը զբաղեցնող Ալեն Սիմոնյանն ապրիլի 9-ի իրադարձություններից հետո հիասթափություն չի ապրել, միակ հիասթափությունն ու ափսոսանքն ապրիլի 9-ից հետո այն է, որ փետրվարի 18-ին փչացրել է իր քվեաթերթիկը և չի քվեարկել Րաֆֆի Հովհաննիսյանի օգտին: Նրա կարծիքով՝ այն, ինչ կատարվեց ապրիլի 9-ին, որևէ մտածող, խորը վերլուծություն անող մարդու համար չի կարող հիասթափության առիթ հանդիսանալ.
«Ինչից պետք է հիասթափվեի, ի՞նչ պետք է լիներ, որ չեղավ, մարդիկ պետք է գնային Բաղրամյան 26-ի դռնե՞րը ջարդեին, կամ ոստիկանները մարդ սպանեի՞ն, իրար վրա կրակեինք, որ հիասթափություն չլինե՞ր։ Ոչ թե հիասթափվել եմ, ընդհակառակը՝ հպարտ եմ»,- «Առաջին լրատվական»-ի հետ զրույցում ասաց Ալեն Սիմոնյանը:
«Բարև Երևան» դաշինքի համամասնական թեկնածուներն արդյոք պատասխանատվություն վերցնո՞ւմ են իրենց վրա ապրիլի 9-ին կատարվածի համար: Ըստ Ալեն Սիմոնյանի՝ նախ ավագանու ցուցակը և նախագահ ընտրված Րաֆֆի Հովհաննիսյանը տարբեր բաներ են, իսկ ինչ վերաբերում է հետևանքներին, ապա հետևանք, որպես այդպիսին, չի եղել: Ըստ նրա՝ պատասխանատվություն կրել է Րաֆֆի Հովհաննիսյանի թիմը, որն ապրիլի 9-ին եղել է առաջին շարքում՝ ի դեմս Րաֆֆի Հովհաննիսյանի, նրա տիկնոջ և որդու, որոնց Րաֆֆի Հովհաննիսյանը չէր փախցրել որևէ տեղ պահելու։
«Ստյոպա Սաֆարյանը, Հովսեփ Խուրշուդյանը, Արմեն Մարտիրոսյանը՝ նրանք բոլորը պատասխանատվություն կրել են: Հիասթափությունը կայանում է նրանում, որ իշխանությունը ցույց տվեց, որ պատրաստ է դիմել ամենաբիրտ, ամենավատ ամենաանօրինական քայելերի՝ իր իշխանությունը պահելու համար, իսկ Րաֆֆի Հովհաննիսյանը և իր թիմը չգնացին այդ բախմանը, քանի որ պարզ չէ՝ ինչի կբերեր դա: Պարզ է, որ մարդիկ, ովքեր եկել էին իշխանություն վերցնելու, չվերցրեցին այն: Բայց սա նույնն է, որ փոքր երեխան պաղպաղակ է ուզում ուտել, բայց ծնողը գիտի, որ ուտի, հիվանդանալու է, և չի թողնում: Ոչինչ, որ երեխան կհիասթափվի, բայց չի հիվանդանա, չի վնասի: Եվ թող սա լինի Րաֆֆի Հովհաննիսյանի վարկանիշի հաշվին, բայց թող մարդ չմահանա մեր երկրում, թող մարտի մեկեր չլինեն»,- ասաց Ալեն Սիմոնյանը:
Նրա դիտարկմամբ՝ պետք չէ անձնավորել պայքարը, նպատակը Րաֆֆիին նախագահ դարձնելը չէ, կամ Բաղրամյան 26-ի դարպասները կոտրելը չէ, նպատակը գործուն պետական համակարգ ունենալն է, որ ոստիկանն իր տեղում լինի, որ քաղաքապետի թեկնածուին վերջին հայհոյանքները «չշռայլի»:
«Հիասթափությունն այնքան վերացական, ոչ լուրջ կատերգորիա է, իհարկե՝ կհիասթափվեն էլ, կուժեղանան էլ, կպարտվեն էլ, կհաղթեն էլ: Ես հպարտ եմ, որ «Բարև Երևան» ցուցակում եմ՝ Արմեն Մարտիրոսյանի, Ստեփան Սաֆարյանի նման տղաների կողքին, մտածող և արդար մարդկանց կողքին, ովքեր իրենց առողջությունը և կյանքը պատարաստ են վտանգել, բայց լինել մարդկանց կողքը և չփախչել, չթաքնվել»,- նշեց Ալեն Սիմոնյանը: