Երրորդ եռամսյակի արդյունքներով Volkswagen ավտոմոբիլային կոնցեռնը ստացել է ավելի շատ կորուստ, քան կանխատեսվում էր։ Դիզելային շարժիչների հետ կապված սկանդալի ֆոնին ավտոկոնցեռնի օպերացիոն կորուստը կազմել է 3.48 մլրդ եվրո (3.84 մլրդ դոլար)։ Այս մասին հայտնում է CNBC-ն՝ հղում անելով ընկերության հաշվետվությանը։
Դա ընկերության առաջին եռամսյակային կորուստն է աշխատանքի վերջին 15 տարում։ Կորուստների հիմնական մասը բաժին է ընկնում սպառողներին տրվող վճարներին։ Սկանդալի պատճառով ամբողջ աշխարհում հետ է կանչվել 11 մլն մեքենա։
Ընկերության գնահատականներով՝ այն արդեն մոտ 6.7 մլրդ եվրո է վճարել սկանդալի համար։
Ընկերության եկամուտը տարեսկզբից աճել է 8.5 տոկոսով, ընդհանուր առմամբ տարեսկզբից ավտոկոնցեռնը վաճառել է 10.14 մլն ավտոմեքենա։
Ավելի վաղ հաղորդվել էր, որ կապված «դիզելային սկանդալի» հետևանքների հետ՝ Volkswagen-ը սկսել է կրճատել աշխատակազմն ու նվազեցնել արտադրական ծավալները։
