Եվրամիությունը մտադիր է զարգացնել Հայաստանի հետ համակողմանի համագործակցությունը փոխադարձ շահ ներկայացնող բոլոր ոլորտներում՝ չնայած 2013-ին Հայաստանի արտաքին քաղաքականության մեջ տեղի ունեցած փոփոխությանը:
Սա ԵՄ Հարևանության և ընդլայնման հարցերով հանձնակատար Յոհաննես Հանի խոսնակ Մայա Կոչիյանչիչի մեկնաբանությունն է Հայաստան-ԵՄ սպասվող նոր բանակցությունների մասին: Պատասխանելով «Առաջին լրատվական»-ի հարցերին՝ խոսնակը նաև տեղեկացրեց, որ բանակցությունների մեկնարկը նախատեսվում է մինչև ընթացիկ տարվա ավարտը:
– Ի՞նչ բնույթի համաձայնագիր են պատրաստվում ստորագրել Երևանն ու Բրյուսելը:
– Եվրամիությունը և Հայաստանը ընդգծել են իրենց քաղաքական կամքը՝ խորացնելու և ընդլայնելու հարաբերությունները համագործակցության բոլոր հնարավոր ոլորտներում՝ չնայած 2013-ին Հայաստանի արտաքին քաղաքականության մեջ տեղի ունեցած փոփոխությանը: Այս համատեքստում կողմերը հաջողությամբ ավարտել են համատեղ ամփոփիչ աշխատանքը, որի արդյունքում նախանշվել են ապագա գործակցության հնարավոր բնագավառները:
– Իսկ ավելի կոնկրետ ո՞ր ոլորտները կներառվեն նոր փաստաթղթի մեջ: Այն կունենա՞ տնտեսական բաղադրիչ, և ի՞նչ մակարդակի տնտեսական համագործակցության հնարավորություն այն կտա:
– ԵՄ արտաքին գործերի խորհուրդը հոկտեմբերի 12-ին լիազորեց Եվրոպական հանձնաժողովին և արտաքին գործերի ու անվտանգության հարցերով բարձր հանձնակատարին սկսել Հայաստանի հետ նոր՝ իրավաբանորեն կապող և համապարփակ համաձայնագրի շուրջ բանակցություններ և հաստատեց համապատասխան բանակցային մանդատը: ԵՄ-ն մտադիր է զարգացնել և ամրապնդել Հայաստանի հետ համակողմանի համագործակցությունը Արևելյան գործընկերության շրջանակներում՝ փոխադարձ շահ ներկայացնող բոլոր ոլորտներում: Իսկ բանակցությունների մեկնարկը նախատեսվում է մինչև ընթացիկ տարվա ավարտը:
– Վերջին երկու տարիներին կողմերը մշտապես հայտարարում են, որ ԵՄ-Հայաստան հարաբերությունները պիտի զարգանան այնպես, որպեսզի չհակասեն Եվրասիական տնտեսական միության (ԵՏՄ) առջև Հայաստանի ստանձնած պարտավորություններին: Ինչպե՞ս են Երևանն ու Բրյուսելը պատրաստվում լուծել այդ խնդիրը:
– Երկու կողմերը նպատակ ունեն ստորագրելու համակողմանի և համապարփակ համաձայնագիր, որը կծածկի քաղաքական, տնտեսական և ոլորտային համագործակցությունը՝ հաշվի առնելով ԵՏՄ-ին Հայաստանի անդամակցությունից բխող պարտավորությունները: Համաձայնագրի ճշգրիտ շրջանակն ու անվանումը կորոշվեն ավելի ուշ փուլում՝ հիմնվելով բանակցությունների կոնկրետ արդյունքների վրա:
ԵՄ-ն և Հայաստանը կընդլայնեն իրենց հարաբերությունները և կվերանայեն այդ հարաբերությունների իրավական բազան դիտարկվող՝ Եվրոպայի հարևանության քաղաքականության ավելի լայն շրջանակներում:
– Եթե ավելի իրատես լինենք, Հայաստանն ունի՞ բավականաչափ ինքնիշխանություն ԵՄ-ի հետ բանակցելու համար: Գուցե այս անգամ Երևանը այդ հարցերը պիտի համաձայնեցնի Մոսկվայի՞ հետ:
– Մենք հարգում ենք Հայաստանի ինքնիշխանությունը և ակնկալում ենք, որ մյուս գործընկերներն էլ նույնը կանեն:
– Եվրամիության պատվիրակության ղեկավար Լյուկ Պիեր Դևինյեն Երևանում Հայաստանի պատվիրակության հետ հանդիպման ժամանակ հայտարարեց. «Այս անգամ մի՛ վախեցեք և ստորագրե՛ք բանակցված համաձայնագիրը»: Եվրոպայում կա՞ն կասկածներ, որ Հայաստանի իշխանությունն այս անգամ էլ կարող է չստորագրել համաձայնագիրը, ինչպես եղավ սեպտեմբերի 3-ի հայտնի հայտարարությունից հետ:
– Մենք հավատում ենք, որ բանակցությունները կիրականացվեն բարեխղճորեն և չեն շահարկվի հնարավոր սցենարների միջոցով:
