Համաշխարհային տնտեսության աճի տեմպերն այս տարի հազիվ թե էապես գերազանցեն անցած տարվա ցուցանիշը: Նման կարծիք է հայտնել Արժույթի միջազգային հիմնադրամի ղեկավար Քրիստին Լագարդը՝ ելույթ ունենալով Նյու Յորքի Տնտեսական ակումբում: Այս մասին հայտնում է ITAR-TASS-ը:
«Մենք տեսնում ենք, որ նախկին ռիսկերին ավելանում են նորերը: Շատ երկրներում ֆինանսական շուկաներում բարելավումը չի վերափոխվել տնտեսության ոլորտում իրական բարելավման»,- հայտարարել է Լագարդը:
Նրա խոսքերով՝ համաշխարհային տնտեսությունը վերականգնման նշաններ է դրսևորում: «Լավ նորությունն այն է, որ այժմ ֆինանսական շուկաներում նկատելի է բարելավում: Քաղաքական գործիչների գործողությունների շնորհիվ իրադրությունը համաշխարհային տնտեությունում այնքան վտանգավոր չէ, որքան կես տարի առաջ»,- ասել է նա:
Լագարդի խոսքերով՝ այժմ աշխարհում կարելի է երկրների երեք խումբ առանձնացնել՝ կախված տնտեսական աճի տեմպերից: Առաջին խմբում արագ զարգացող տնտեսությամբ երկրներն են, մասնավորապես՝ Հարավարևելյան Ասիայի և Կենտրոնական Աֆրիկայի պետություննրը: Նրանց հաջորդում են այն պետությունները, որոնք շարժվում են դրական ուղով, օրինակ՝ ԱՄՆ-ը, Շվեդիան և Շվեյցարիան: Երրորդ խմբում են այն երկրները, որոնք դեռ շատ անելիքներ ունեն տնտեսության վերականգնման համար: Դրանք եվրոգոտու պետություններն են ու Ճապոնիան:
Լագարդի կարծիքով՝ եվրոգոտու երկրների իշխանությունները պետք է ավելի շատ կոլեկտիվ որոշումներ ընդունեն՝ ճգնաժամի դեմ պայքարի համար: Նա կարծում է, որ արժութային բլոկի ամրապնդման համար իրական բանկային միություն է անհրաժեշտ:
