Ադրբեջանական APA լրատվական գործակալության փոխանցմամբ՝ Վրաստանին ադրբեջանական գազի մատակարարումների ոլորտում որևէ խնդիր չկա։ Այդ մասին հայտարարել է ադրբեջանական SOCAR-ի փոխնախագահ Սուլեյման Գասիմովը:
«Կարելի է ասել, որ վրացական գազի շուկայի ապահովումն իրականացնում է SOCAR-ը։ Այստեղ չկա որևէ խնդիր։ Վրաստանի փոխվարչապետ, էներգետիկայի նախարար Կախա Կալաձեի կողմից ռուսական «Գազպրոմի» հետ անցկացրած բանակցությունները պետության ներքին գործն են և որևէ կերպ չեն ազդում SOCAR-ի հետ հարաբերությունների վրա։ Կախա Կալաձեն ինքը նույնպես հայտարարել է, որ Ադրբեջանի հետ չկա որևէ խնդիր։ Ադրբեջանը հաջողությամբ կատարում է և կատարելու է իր պարտավորությունները»։
Հիշեցնենք, որ ավելի վաղ Կալաձեն հայտարարել էր, թե Ադրբեջանն ունակ չէ բավարարել Վրաստանի գազային կարիքները, իսկ Soccar Georgia-ի ղեկավար Մահիր Մամեդովը հակադարձել էր, որ Ադրբեջանն ունակ է անել դա և ներկայումս գրեթե ամբողջովին ապահովում է Վրաստանի գազային կարիքները։
