Եգիպտոսի բանակը երկու տարի առաջ՝ «արաբական գարնան» ընթացքում մասնակցել է առևանգումների, կտտանքների և սպանությունների: Այս մասին ասվում է երկրի նախագահ Մուհամմեդ Մուրսիի կազմած հանձնաժողովի զեկույցում, որը նախագահին է ուղարկվել հունվարին: Զեկույցից մի հատված հայտնվել է բրիտանական The Guardian պարբերականի տրամադրության տակ:
Հաշվետվությունում նշվում է նաև, որ պետության շատ բնակիչներ անհետ կորած են հայտարարվել զինվորական հսկիչ անցակետերում ձերբակալությունից հետո:
Բացի այդ, նախկին նախագահ Հոսնի Մուբարաքի դեմ Կահիրեի Թահրիր հրապարակում ցույցի դուրս եկած եգիպտացիները հարակից պետական թանգարանում դարձել են զինվորականների կողմից խոշտանգումների զոհեր:
Մուբարաքի տապալմանը հանգեցրած իրադարձությունների թեժ պահին, եգիպտական բանակն իրեն պաշտոնապես չեզոք է հայտարարել, մինչդեռ կամայականության մեղադրանքները 2011 թվականին բարդվել են ոստիկանության վրա:
Մի քանի հարյուր մարդ է զոհվել անկարգությունները ճնշելու իշխանությունների փորձի ժամանակ:
