Ո՞ւմ կողքին է ԲՀԿ-ն «սրտով ու մտքով»

Երևանի ավագանու ընտրություններում ԲՀԿ ցուցակի երրորդ տեղը զբաղեցնող ու ԲՀԿ նախընտրական շտաբի պետ, գործարար պատգամավոր Աբրահամ Մանուկյանը ևս գնացել էր Սերժ Սարգսյանի երդմնակալության արարողությանը: «Առաջին լրատվական»-ը երեկ զրուցեց նրա հետ` պարզելու, թե ի վերջո` ո՞ւմ կողքին է ԲՀԿ-ն: Հիշեցնենք նաև, որ վերջերս ոստիկանությունը նրա տղաների մեքենայից զենք էր հայտնաբերել, ու այդ գործով կալանավորված անձ կա:

– Պարոն Մանուկյան, ԲՀԿ–ն միշտ ասում է` ժողովրդի կողքին է, բայց ստացվում է` ԲՀԿ–ականները Սերժ Սարգսյանի կողքին են:

– Ո՞վ ա ասում, մենք միշտ ժողովրդի կողքին ենք, չկասկածեք: Ո՞վ է կասկածում:

– Դուք ԲՀԿ նախընտրական շտաբի պետն եք, ինչպե՞ս է, որ գնացել էիք Սերժ Սարգսյանի երդմնակալությանը:

– Բայց ինչի՞ չպետք ա գնայի, մեր երկրի նախագահն ա:

– Դե, Գագիկ Ծառուկյանը չէր եկել, մտածում էինք, որ ԲՀԿ–ն էլ պիտի չգար:

– Էդ հարցերով դիմեք տիկին Զոհրաբյանին:

– Իսկ Ձեզ Գագիկ Ծառուկյա՞նն էր հանձնարարել գնալ Սերժ Սարգսյանի երդմնակալության արարողությանը:

– Տենց հանձնարարություն կոնկրետ երբեք չի եղել: Մենք մեր կամքի տերն ենք: Մեր ֆրակցիան երբեք տենց հանձնարարականներով չի շարժվում, բոլորը շարժվում են իրենց մտքի, սրտի ուղղորդմամբ:

– Ասել է թե` Ձեր միտքն ու սի՞րտն էր Ձեզ ուղղորդել դեպի Համալիր:

– Քաղաքական որոշում չի եղել ոչ տենց, ոչ հակառակը:

– Քանի որ Դուք նախկինում հանրապետական եք եղել, հնարավո՞ր է…:

– Ես երբեք հանրապետական չեմ եղել, սխալվում եք:

– Նախկինում նաև Սաշիկ Սարգսյանի մոտ ընկերն եք, չէ՞, եղել:

– Ես էսօր էլ եմ ընկեր, որովհետև իմ ընկերությունը շարունակվում ա: Բոլորի հետ իմ ընկերությունը շարունակվում ա:

– Որպես ԲՀԿ ավագանու շտաբի պետ` ինչպե՞ս եք գնահատում նախընտրական արշավը:

– Մրցակցային:

– Այսինքն` պայմանները հավասա՞ր են, ՀՀԿ–ն չի՞ օգտագործում իր լծակները:

– Ամեն դեպքում էս պահին լրիվ նորմալ գնում ա մրցակցային պայքար:

– ՀՀԿ–ն հայտարարություն արեց ընտրակաշառք բաժանելու հետ կապված, որ դատապարտում են ցանկացած երևույթ…

– Մենք երկու անգամ ավելի ենք դատապարտում, միանշանակ:

– Սակայն տեղեկություններ կան, որ ընտրակաշառքի որոշ խոստումներ են տրվում:

– Բացառված ա:

– Պնդում եք, որ ԲՀԿ–ն ընտրակաշառք չի՞ բաժանելու այս անգամ:

– Միանշանակ: Ու երբեք էլ չի բաժանել, ասեմ: Ժողովուրդը ԲՀԿ-ին ընդունում է: Մենք մեր համակիրներն ունենք, կուսակցության անդամների մեծ զանգված ունենք:

– Նախորդ անգամ` խորհրդարանական ընտրություններում, հայտնի է, որ և ՀՀԿ–ն, և ԲՀԿ–ն 10-հազարական դրամ ընտրակաշառք էին բաժանում:

– Ես համարում եմ, որ դրանք սուտ տեղեկություններ են, նման փաստ չի արձանագրված:

– Իսկ ԲՀԿ շտաբը հիմա ի՞նչ աշխատանքներով է զբաղվում:

– Աշխատում ենք, կազմակերպում ենք մեր քարոզչությունը, ժողովրդի հետ հանդիպումներ ենք ունենում, մեր համակիրների, մեր կուսակցականների հետ աշխատանքներ ենք տանում: Մենք ծրագիր ենք ներկայացրել և ուզում ենք կյանքի կոչել մեր ծրագրերը:

– Պարոն Մանուկյան, վերջերս Ձեր տղաների մեքենաներում հայտնաբերված զենքի հետ կապված ի՞նչ կարող եք ասել:

– Սուտ է, չպարզաբանվե՞ց ինչի:

– Ոստիկանության հաղորդագրությամբ` Ձեր տղաների մեքենայում է զենքը հայտնաբերվել:

– Նման բան չի եղել, պարզաբանումները եղել են: Ում մոտ էլ զենքը եղել է, էդ մարդը էսօր ազատությունից զրկված է: Իմ տղաների հետ կապ չունի:

– Բայց Ձեր տղաների մեքենայում է գտնվել զենքը:

– Ի՞նչ կապ ունի: Ձեր մեքենայում էլ պամադա կարա լինի: