Ամերիկյան կողմն առաջվա պես գտնում է, որ Սիրիայի նախագահ Բաշար Ասադը կորցրել է վստահությունը, սակայն խոստովանում է, որ Սիրիայի խնդիրների լուծման համար անհրաժեշտ են փոխզիջումներ: Այդ մասին երկուշաբթի հայտարարել է ԱՄՆ պետդեպարտամենտի ներկայացուցիչ Ջոն Կիրբին, հայտնում է interfax.com.ua-ն:
Խոսելով Ասադի և նրա կառավարության հնարավոր դերի մասին, Կիրբին նշել է, որ նրանք հավանաբար կկարողանան մասնակցել անցումային շրջանի քաղաքական պրոցեսին:
Նա չի պատասխանել լրագրողի այն հարցին, թե ինչպիսին կլինի ԱՄՆ-ի արձագանքն այն դեպքում, եթե Ասադը Սիրիայի ընտրություններում հաղթանակ տանի, և եթե ընտրությունները համապատասխան լինեն ժողովրդավարական չափանիշներին: «Ես չեմ քննարկի վարկածային իրադրությունները»,- ասել է նա:
