2012-ի վերջին արաբական անկախ ներդրումային հիմնադրամները (ԱՆՀ) գնահատվել են մոտ 1 տրիլիոն 797 միլիարդ դոլար՝ համաշխարհային անկախ ներդրումային հիմնադրամների 35 տոկոսը: Այս մասին հաղորդում է as-Shark al-Asuat պարբերականը:
Արաբական ԱՆՀ-ների մեծ մասը կազմում են նավթի վաճառքից ստացված ակտիվները: Դրանք պահպանվում են առաջին հերթին ԱՄԷ-ի, Քաթարի, Օմանի, Լիբիայի և Սաուդյան Արաբիայի ներդրումային հիմնադրամներում:
Հետազոտությունը նաև ցույց է տվել, որ 2012-ի վերջին ԱՄԷ-ի հիմնադրամների ծավալը հասել է 816 մլրդ դոլարի, այսինքն՝ աշխարհի բոլոր ԱՆՀ-ների 16 տոկոսը: Քուվեյթի համար այդ ցուցանիշը կազմում է 296 մլրդ դոլար, Սաուդյան Արաբիայի համար՝ 553 մլրդ դոլար:
TheCityUK գործակալության տնտեսության ավագ հետազոտող Մարկո Մասլակովիչը, ով գլխավորել է այս ուսումնասիրությունը, կարծում է, որ առաջիկայում Պարսից ծոցի պետությունների ԱՆՀ-ները կաճեն տարեկան 7-8 տոկոսով: Սակայն ակտիվների ցուցանիշն ավելի ցածր կլինի, քան Ասիայի երկրներինը: