2014 ֆինանսական տարվա ԱՄՆ բյուջեի նախագիծը նախատեսում է Պետդեպին հատկացվող միջոցների կրճատում, սակայն ամերիկյան արտաքին քաղաքական գերատեսչությունը մտադիր է ուժեղացնել դիվանագիտական առաքելությունների անվտանգությունը՝ ասվում է Պետդեպի հաղորդագրության մեջ: Այս մասին փոխանցում է RIA Novosti-ն:
Համաձայն չորեքշաբթի ԱՄՆ նախագահի կողմից ներկայացված բյուջեի նախագծի՝ Պետդեպն ու Միջազգային զարգացման գործակալությունը (USAID) 2014 ֆինանսական տարում կստանան 47.8 միլիարդ դոլար՝ 6 տոկոսով պակաս 2012 ֆինանսական տարվանից:
Միևնույն ժամանակ ծրագրվում է 5 տոկոսով մեծացնել դիվանագիտական առաքելությունների պահպանությունն իրականացնող ծառայողների թիվը, ինչպես նաև ուժեղացնել թեժ կետերում գտնվող դիվանագետների անվտանգության ապահովման միջոցառումները: Ընդհանուր առմամբ այդ ոլորտում ծրագրերի համար հատկացվում է 4.4 մլրդ դոլար:
Դիվանագիտական առաքելությունների անվտանգության ապահովման հարցի վրա ամերիկացիների հատուկ ուշադրությունը սևեռվեց 2012-ի սեպտեմբերին՝ Լիբիայի Բենղազի քաղաքում ամերիկյան հյուպատոսության վրա տեղի ունեցած զինված հարձակումից հետո, որի հետևանքով զոհվեցին այդ երկրում ԱՄՆ դեսպան Քրիստոֆեր Սթիվենսը և ևս 3 մարդ: Անցած շաբաթվա վերջին էլ Աֆղանստանում ահաբեկչության հետևանքով զոհվել է Քաբուլում ԱՄՆ դեսպանության 25-ամյա աշխատակցուհի Էնն Սմենդինգոֆը:
