Լեռնային Ղարաբաղի հակամարտության համընդգրկուն կարգավորումը հնարավոր չի լինի առանց փախստականների խնդրի լուծման: Երևանում լրագրողների հետ հանդիպմանը այս մասին հայտարարել է ԵԱՀԿ Մինսկի խմբի ԱՄՆ համանախագահ Ջեյմս Ուորլիքը: Ամերիկացի դիվանագետի խոսքով` թեև փախստականների խնդիրը միշտ չէ, որ հրապարակայնորեն քննարկվում է, սակայն այն մշտապես ընդգրկված է լինում մասնավոր հանդիպումների օրակարգում: «Տարածաշրջանում փախստականների ձայնը պետք է լսելի դարձնել: Հարցերից մեկը, որ մենք ցանկանում ենք քննարկել որպես համընդգրկուն կարգավորման մաս, հնարավորությունների ստեղծումն է, որպեսզի փախստականները և ներքին տեղահանվածներրը կարողանան վերադառնալ իրենց տները»,- նշեց միջնորդը:
Նա նաև հավելել է, որ հանդիպումների ժամանակ համանախագահները խնդրելու են երկու երկրների նախագահներին և արտգործնախարարներին համաձայնության գալ այն սկզբունքների շուրջ, որոնց հիման վրա իրենք կարող են շարունակել բանակցությունները:
Ուորլիքը հիշեցրեց նաև, որ իր վերջին երևանյան այցի ժամանակ ՀՀ-ում ԱՄՆ դեսպանատանը օգտակար հանդիպում է ունեցել փախստականների ներկայացուցիչների հետ, ծանոթացել նրանց խնդիրներին: Իսկ այս անգամ համանախագահները Ադրբեջան այցի ժամանակ հանդիպելու են ադրբեջանական փախստականների հետ:
