ՊԵԿ-ի կողմից Վանաձորում գործող «Մհեր-Լիլուս» ՍՊԸ-ի նկատմամբ հարկային հետապնդումների և այժմ էլ հերթական՝ բյուջեի նկատմամբ պարտավորությունների հարցով ստուգումների հետ կապված այսօր ԱԺ նիստում կառավարության հետ հարցուպատասխանի ժամանակ անկախ պատգամավոր Էդմոն Մարուքյանը հետաքրքրվեց, թե ինչքան կարելի է ՊԵԿ-ը ստուգումներ իրականացնի և ճնշի ընկերությանը:
2011թ. Իրանից հեղուկ սոդիումի հիպոքլորիդ տեղափոխող մեքենան վթարի էր ենթարկվել Դիլիջանի տարածքում: Բայց պահանջում են մաքսազերծել վթարի հետևանքով ցնդած ապրանքը, որն այդպես էլ նշանակված վայր` Վանաձորի մաքսատուն, հետո էլ՝ ընկերության արտադրամաս չէր հասել:
Ըստ Մարուքյանի՝ այս 1 տարում ընկերության շրջանառությունը նվազել է 5 մլն դրամով:
Ֆինանսների նախարարի պաշտոնակատար Վաչե Գաբրիելյանը նշեց, որ իրանական մեքենայի և սոդիումի հիպոքլորիդի հարցով գործը քննվում է դատարանում, իսկ 2013թ. ստուգումը բխում է նախորդ ստուգումներից:
«Եթե կան խնդիրներ, որոնք իսկապես առաջացել են և տեղիք են տալիս տնտեսվարողի շարունակական բողոքների, պատրաստ ենք քննել միջգերատեսչական հանձնաժողովում: Չեմ կարծում, որ ահաբեկումների, այլ հարկային հաշիվների ստուգման հարց կա»,- ասաց Վ. Գաբրիելյանը:
«Բխեցնել. արդեն 3 տարի է՝ բխեցնում են, այսպես շարունակելու դեպքում մարդը կփակի ընկերությունը, կգնա: Սրան պետք է վերջ տրվի, մենք այսպես չենք կարող փոքր բիզնեսին աջակցել, կփակվեն»,- հակադարձեց Է. Մարուքյանը:
