«Երկխոսության մասին Հայ ազգային կոնգրեսն իր հստակ դիրքորոշումը վաղուց է ներկայացրել` հանձին Լևոն Տեր-Պետրոսյանի»,- անդրադառնալով ՄԻՊ Կարեն Անդրեասյանի հայտարարությանը, թե ինքը պատրաստ է երկխոսության միջնորդ լինել իշխանությունների ու Կոնգրեսի միջև՝ ասաց Հայ ազգային կոնգրեսի անդամ Վլադիմիր Կարապետյանը:
Հիշեցնենք, որ Լևոն Տեր-Պետրոսյանը Կոնգրեսի վերջին հանրահավաքի ժամանակ հայտարարել էր. «Մենք ակնկալում ենք, որ մինչև հաջորդ հանրահավաքը, որ կկայանա ապրիլի 28-ին, հանուն երկխոսության, մեր կողմից առաջ քաշված երեք նվազագույն պահանջները, որոնք են՝ քաղբանտարկյալների ազատարձակումը, Ազատության հրապարակում հանրահավաքներ անցկացնելու իրավունքի վերականգնումը և մարտի 1-ի սպանությունները բացահայտելու պաշտոնական հավաստիացումը, կատարված պետք է լինեն։ Եթե դա տեղի չունենա, ապա Հայ ազգային կոնգրեսը, սպառված համարելով երկխոսության հնարավորությունը, հարկադրված է լինելու կտրուկ փոխել իր մարտավարությունն ու գործողությունների բնույթը։
Մենք դեռևս հակված չենք իշխանության հետ վերջնագրի լեզվով խոսելու, բայց ժողովրդի համբերությունն էլ չափ ու սահման ունի։ Ապրիլի 28-ը պետք է դառնա կա՛մ երկխոսության սկզբնավորման, կա՛մ էլ իշխանության ու հասարակության վերջնական ջրբաժանի օր»։
