Չորեքշաբթի Պակիստանի Զինված ուժերը հաջողությամբ փորձարկել են Hatf IV Shaheen-1 մոդեռնիզացված միջին հեռահարության բալիստիկ հրթիռը, որը կարող է կրել ինչպես միջուկային, այնպես էլ սովորական մարտագլխիկներ: Այս մասին հաղորդում է RIA Novosti-ն՝ վկայակոչելով Պակիստանի բանակի մամլո ծառայությանը:
Հրթիռը, որի հեռահարությունը կազմում է 900 կմ, արձակվել է պայմանական թիրախով՝ Արաբական ծովում: Հրթիռի արձակմանը հետևել են Պակիստանի զինվորական բարձրաստիճան պաշտոնյաներ:
Նշենք, որ փետրվարին ԱՄՆ-ի կոնգրեսի հետազոտական ծառայությունը հաղորդել էր, որ Պակիստանը ներկա պահին ունի 90-110 միջուկային մարտագլխիկ: Տարբեր գնահատականների համաձայն՝ Պակիստանը վերջին տարիներին կրկնապատկել է իր մարտագլխիկների թիվը: Պակիստանի հիմնական պոտենցիալ թշնամին՝ Հնդկաստանը, տարբեր հաշվարկների համաձայն, ունի 80-100 մարտագլխիկ:
