«Մենք ենք այս քաղաքի տերը» քաղաքացիական նախաձեռնության անդամները հույս ունեն, որ Երևանի նոր քաղաքապետի հետ համագործակցությունը կստացվի:
Նախաձեռնությունը բավական տխուր փորձ ունի նախորդ քաղաքապետի` Գագիկ Բեգլարյանի հետ համագործակցելու հարցում: «Քաղաքապետը չէր վսահում մեզ և կարծում էր, որ մեր հետևում կանգնած են քաղաքական ուժեր, որոնք փորձում են մեր միջոցով վնասել իրեն»,- սա է Բեգլարյանի հետ համագործակցության ձախողման պատճառը` ըստ «Մենք ենք այս քաղաքի տերը»-ի նախաձեռնող անդամ Արթուր Ավթանդիլյանի:
Նոր քաղաքապետի գործունեության մեջ Ավթանդիլյանը կառուցողական մոտեցում է տեսնում:
Հիշեցնենք, որ մեկ ամիս առաջ «Մենք ենք այս քաղաքի տերը» նախաձեռնության անդամները հանդիպում են ունեցել քաղաքապետ Կարեն Կարապետյանի հետ և ներկայացրել Երևանի կանաչապատ տարածքների ոչնչացման, մասնավորապես՝ Ուսանողական այգու, Վիշապների պուրակի, Գլխավոր պողոտայի այգու կառուցապատման դեպքերը: Քաղաքապետը խոստացել է ուսումնասիրության հանձնել ներկայացված փաստաթղթերը:
Թեև «Մենք ենք մեր քաղաքի տերը» նախաձեռնության առաջադրած հարցերի պատասխանը քաղաքապետը դեռ չի տվել, բայց Ավթանդիլյանի հույս ունի` Կարապետյանը ավելի հետևողական կլինի քաղաքի կանաչ գոտիների պահպանման հարցում:
